ఆదోనీలో క్రికెట్ బెట్టింగ్ ముఠా – 91 లక్షల నగదు స్వాధీనం
- యువతను లక్ష్యంగా చేసుకున్న బెట్టింగ్ ముఠాలు
- ఎస్పీ హెచ్చరిక – బెట్టింగ్కు పాల్పడితే కఠిన చర్యలు తప్పవు
క్రికెట్ అంటే క్రీడ మాత్రమే కాదు – ఇప్పుడు అది యువత ఆశలతో ఆడుతున్న ఓ ప్రమాదకర ఆటగా మారింది. కర్నూలు జిల్లాలోని ఆదోనీలో అంతరాష్ట్ర స్థాయిలో క్రికెట్ బెట్టింగ్ ముఠా వ్యవహారం వెలుగులోకి వచ్చింది. యువతను టార్గెట్ చేస్తూ, ఇంటర్నెట్, మొబైల్ యాప్ల సహాయంతో ఈ ముఠా భారీగా బెట్టింగ్ కార్యకలాపాలు సాగిస్తూ పోలీసులు కన్నుల్లో పడింది.
శనివారం జరిగిన తనిఖీల్లో ఆదోనీ పోలీసులు ఏడుగురు సభ్యులతో కూడిన క్రికెట్ బెట్టింగ్ ముఠాను అరెస్ట్ చేశారు. వారి నుంచి రూ.91 లక్షల నగదు, 7 మొబైల్ ఫోన్లు స్వాధీనం చేసుకున్నారు. కర్నూలు జిల్లా ఎస్పీ విక్రాంత్ పాటిల్ ఈ విషయాన్ని మీడియా ముందు వెల్లడించారు.
యాప్ల వలలో చిక్కుతున్న యువత – ఆర్థిక నష్టాలు, ఆత్మహత్యలు
ఈ ముఠా సభ్యులు వివిధ బెట్టింగ్ యాప్ల ద్వారా యువతను ప్రలోభాలకు గురిచేస్తూ బెట్టింగ్లో లాగుతున్నారు. ‘అధిక లాభాలు వస్తాయి’ అనే మాయమాటలతో వందలు, వేల రూపాయలు కాదు – లక్షల రూపాయల వరకు అప్పులు తీసుకొని యువత బెట్టింగ్కు మొగ్గు చూపుతున్నారు. ఫలితంగా వారు తీవ్ర ఆర్థిక నష్టాలకు గురవుతున్నారు. పలువురు మానసికంగా దెబ్బతిని ఆత్మహత్యలు చేసుకునే దాకా వెళ్తున్నారు.
ఈ ముఠాపై ప్రజల నుంచి వస్తున్న ఫిర్యాదుల మేరకు పోలీసులు ప్రత్యేక దృష్టి సారించి, చివరికి వారిని పట్టుకున్నారు. ఎస్పీ విక్రాంత్ పాటిల్ మాట్లాడుతూ – “బెట్టింగ్ వల్ల లాభం ముఠా నిర్వాహకులకే ఉంటుంది. సామాన్య ప్రజలు మాత్రం మోసపోతున్నారు. క్రికెట్ బుకీలు డబ్బు ఆశ చూపి యువతను బెట్టింగ్లోకి లాగుతున్నారు. బెట్టింగ్కు పాల్పడినా, ప్రోత్సహించినా కఠిన చర్యలు తప్పవు,” అని హెచ్చరించారు.
Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.
