Madurai Court Sentence : 9 మంది పోలీసులకు రెండేసి మరణశిక్షలు !
Madurai Court Sentence తమ కస్టడీలో ఉన్న తండ్రీ–కొడుకులను అమానుషంగా హింసించి చంపిన కేసులో తమిళనాడులో సంచలన తీర్పు వెలువడింది. మదురై ఫస్ట్ అడిషనల్ డిస్ట్రిక్ట్ అండ్ సెషన్స్ కోర్టు ఈ కేసులో దోషులుగా తేలిన తొమ్మిది మంది పోలీసు అధికారులకు రెండేసి మరణశిక్షలు విధించింది. అదనంగా, బాధిత కుటుంబానికి రూ.1.40 కోట్ల నష్టపరిహారం చెల్లించాలని ఆదేశించింది. ఈ కేసు “అరుదైన కేసుల్లో అత్యంత అరుదైనది” అని న్యాయమూర్తి జి. ముత్తుకుమరన్ వ్యాఖ్యానించారు. చట్టాన్ని కాపాడాల్సిన పోలీసులే చట్టవ్యతిరేకంగా ప్రవర్తించారని తీవ్రంగా విమర్శించారు.
లాక్డౌన్ ఉల్లంఘన… ప్రాణాలు తీసిన కస్టడీ
2020 జూన్ 19న తూత్తుకుడి జిల్లా సాత్తాన్కుళంలో జయరాజ్ (58), ఆయన కుమారుడు బెనిక్స్ (31)లను పోలీసులు అదుపులోకి తీసుకున్నారు. కరోనా లాక్డౌన్ సమయంలో సెల్ఫోన్ షాప్ను నిర్ణీత సమయం మించి తెరిచి ఉంచారన్న కారణంతో వారిపై కేసు నమోదు చేశారు. విచారణ పేరుతో స్టేషన్లో రాత్రంతా లాకప్లో ఉంచి తీవ్రంగా కొట్టారు. తీవ్ర గాయాలతో ఉన్న వారిని మరుసటి రోజు కోవిల్పట్టి సబ్జైలుకు తరలించారు. పరిస్థితి విషమించడంతో జూన్ 22న ఆస్పత్రికి తరలించగా బెనిక్స్ అదే రోజు, జయరాజ్ జూన్ 23న మరణించారు.
ఈ ఘటన దేశవ్యాప్తంగా తీవ్ర ఆగ్రహానికి దారి తీసింది. ప్రజలు, వాణిజ్య సంఘాలు పెద్ద ఎత్తున నిరసనలు చేపట్టాయి. మద్రాస్ హైకోర్టు మదురై బెంచ్ స్వయంగా కేసును తీసుకుని దర్యాప్తు ఆదేశించింది. అనంతరం కేసు సీబీఐకి బదిలీ అయ్యింది. దర్యాప్తులో పది మంది పోలీసులను అరెస్టు చేశారు. వారిలో ఎస్సై పాల్దురై జైలులోనే కరోనా కారణంగా మృతి చెందడంతో మిగతా తొమ్మిది మందిపై విచారణ కొనసాగింది.
“పైశాచిక హింస” – కోర్టు తీవ్ర వ్యాఖ్యలు
సీబీఐ దాఖలు చేసిన 1,500 పేజీల చార్జిషీట్, పోస్టుమార్టం నివేదికల ఆధారంగా కోర్టు తీవ్ర వ్యాఖ్యలు చేసింది. బాధితుల శరీరంపై ఉన్న గాయాలు సహజమైనవి కాదని, పదేపదే కొట్టడంతోనే మరణించారని స్పష్టం చేసింది. గాయాలు వారు స్వయంగా చేసుకున్నారన్న వాదనను పూర్తిగా తోసిపుచ్చింది.
న్యాయమూర్తి వ్యాఖ్యానిస్తూ –
- చిన్నపాటి నిబంధన ఉల్లంఘనకే నిరాయుధులైన ఇద్దరిపై అమానుష దాడి చేశారు
- బట్టలు విప్పించి విచక్షణారహితంగా కొట్టారు
- రాత్రి 7.40 నుంచి తెల్లవారుజామున 3 గంటల వరకు లాఠీలతో హింసించారు
- లాకప్ గోడలపై రక్తపు చారలు కనిపించాయి
అని పేర్కొన్నారు. “ఇలాంటి నేరాలకు యావజ్జీవ శిక్ష సరిపోదు. కఠిన శిక్ష అవసరం” అంటూ మరణశిక్ష విధించారు.
నష్టపరిహారం ఆదేశం
దోషుల నుంచి వసూలు చేసే జరిమానా మొత్తాన్ని బెనిక్స్ తల్లికి అందజేయాలని కోర్టు ఆదేశించింది. కస్టడీ హింసపై ఆందోళన వ్యక్తం చేస్తూ, 2022 నుంచి ఇప్పటి వరకు తమిళనాడులో పోలీసు చిత్రహింసలకు 24 మంది బలయ్యారని, వారిలో 17 ఏళ్ల బాలుడు కూడా ఉన్నాడని కోర్టు గమనించింది.
English Summary
The Madurai First Additional District and Sessions Court delivered a landmark judgment in the 2020 Sathankulam custodial death case. Judge G. Muthukumaran awarded double death sentences to nine police officers for the brutal murder of Jayaraj and his son Beniks. The court also ordered the convicted officials to pay a compensation of ₹1.40 crore to the victims’ family members. Describing it as a “rarest of rare” case, the judge emphasized that law enforcers had turned lawbreakers by torturing unarmed civilians.
