వెనిజులాపై విరుచుకుపడ్డ అమెరికా సేనలు.. బంధీగా అధ్యక్షుడు నికోలస్ మదురోను

అమెరికా, వెనిజులా మధ్య నెలకొన్న ఉద్రిక్తతలు చివరకు యుద్ధానికి దారితీశాయి. శనివారం తెల్లవారుజామున వెనిజులా రాజధాని కారకాస్‌పై అమెరికా వైమానిక దాడులకు దిగింది. నగరంలోని కీలక సైనిక స్థావరాలు, ప్రభుత్వ భవనాలపై బాంబుల వర్షం కురిపించడంతో భారీ ఎత్తున పేలుళ్లు సంభవించాయి. ఈ దాడుల వల్ల నగరం చుట్టూ దట్టమైన పొగ అలుముకోవడమే కాకుండా, అనేక ప్రాంతాల్లో విద్యుత్ సరఫరా నిలిచిపోయింది.

ముఖ్యంగా కారకాస్‌లోని ప్రధాన సైనిక స్థావరం ‘ఫ్యూర్టే టియునా’, వైమానిక కేంద్రం ‘లా కార్లోటా’ లక్ష్యంగా ఈ దాడులు జరిగాయి. అమెరికా అధ్యక్షుడు డొనాల్డ్ ట్రంప్ ఈ ఆపరేషన్‌ను ధృవీకరిస్తూ, ఇది వెనిజులా ప్రజలను నియంతృత్వం నుండి విముక్తి చేసే చర్యగా అభివర్ణించారు. ఈ మెరుపు దాడులతో దక్షిణ అమెరికా ఖండంలో తీవ్ర కలకలం రేగింది.

నికోలస్ మదురోను బంధించినట్లు ట్రంప్ ప్రకటన

ఈ దాడుల అనంతరం జరిగిన నాటకీయ పరిణామాల్లో వెనిజులా అధ్యక్షుడు నికోలస్ మదురోను మరియు ఆయన భార్య సిలియా ఫ్లోరెస్‌ను అమెరికా దళాలు అదుపులోకి తీసుకున్నాయి. వారిని ఇప్పటికే వెనిజులా నుండి విమానంలో తరలించినట్లు ట్రంప్ సోషల్ మీడియా వేదికగా ప్రకటించారు. మాదకద్రవ్యాల అక్రమ రవాణా (నార్కో టెర్రరిజం) ఆరోపణలపై ఈ ఆపరేషన్ నిర్వహించినట్లు అమెరికా వర్గాలు వెల్లడించాయి.

మరోవైపు వెనిజులా ప్రభుత్వం ఈ చర్యను తీవ్రంగా ఖండించింది. అమెరికా చేస్తున్నది ఏకపక్ష దురాక్రమణ అని, తమ దేశ సహజ వనరులైన చమురు, ఖనిజాలను కొల్లగొట్టేందుకే ఈ దాడులు చేస్తున్నారని మదురో ప్రభుత్వం ఆరోపించింది. దేశంలో జాతీయ అత్యవసర పరిస్థితిని విధిస్తూ, ప్రజలందరూ వీధుల్లోకి వచ్చి అమెరికా దుశ్చర్యను నిరసించాలని పిలుపునిచ్చారు.

అంతర్జాతీయ సమాజంలో ఆందోళన

అమెరికా చేపట్టిన ఈ మెరుపు దాడులతో అంతర్జాతీయ విమానయాన సంస్థలు అప్రమత్తమయ్యాయి. అమెరికా పౌర విమానయాన సంస్థ (FAA) వెనిజులా గగనతలంలో విమానాల రాకపోకలను పూర్తిగా నిషేధించింది. కొలంబియా, క్యూబా వంటి పొరుగు దేశాలు ఈ దాడులను తీవ్రంగా ఖండిస్తూ ఐక్యరాజ్యసమితి భద్రతా మండలి అత్యవసరంగా సమావేశం కావాలని డిమాండ్ చేశాయి.

ఈ దాడుల నేపథ్యంలో వెనిజులాలో పరిస్థితి అస్థిరంగా మారింది. అధ్యక్షుడు మదురో ఆచూకీపై వెనిజులా ఉపాధ్యక్షురాలు డెల్సీ రోడ్రిగ్జ్ ఆందోళన వ్యక్తం చేస్తూ, ఆయన క్షేమంగా ఉన్నారని నిరూపించాలని డిమాండ్ చేశారు. రాబోయే గంటల్లో మరిన్ని దాడులు జరిగే అవకాశం ఉండటంతో సరిహద్దు దేశాల్లో సైన్యం అప్రమత్తమైంది.

Saran Kumar Thalapula