సన్నాసులకు ఎడిటింగ్ కూడా సరిగ్గా రాదు: టీటీడీ ఛైర్మన్

సోషల్ మీడియాలో తనపై జరుగుతున్న దుష్ప్రచారాన్ని తిరుమల తిరుపతి దేవస్థానం (TTD) ఛైర్మన్ బీఆర్ నాయుడు తీవ్రంగా ఖండించారు. రాజకీయ కక్షతోనే డీప్ ఫేక్ టెక్నాలజీని ఉపయోగించి తనపై మార్ఫింగ్ వీడియోలు, ఫేక్ ఫోటోలను సృష్టించారని ఆయన మండిపడ్డారు. తన వ్యక్తిత్వాన్ని, టీటీడీ పవిత్రతను దెబ్బతీయాలని చూస్తున్న శక్తులకు తాను భయపడే ప్రసక్తే లేదని ఆయన స్పష్టం చేశారు. కేవలం తప్పుడు ఉద్దేశంతో ఎడిటింగ్ చేసిన సన్నాసులు ఈ కుట్రకు పాల్పడ్డారని ఆగ్రహం వ్యక్తం చేస్తూ, ఈ అశ్లీల ప్రచారం వెనుక ఉన్న వారిని వదిలిపెట్టేది లేదని హెచ్చరించారు.

అవి 20 ఏళ్ల నాటి ఫోటోలు.. ఫ్యామిలీ ఫ్రెండ్స్‌ను కలవడం తప్పా?

ప్రస్తుతం వైరల్ అవుతున్న ఫోటోల వెనుక ఉన్న నిజాన్ని బీఆర్ నాయుడు బహిర్గతం చేశారు. ఆ ఫోటోలు ఇప్పుడు తీసినవి కావని, సుమారు 20 ఏళ్ల నాటివని ఆయన వెల్లడించారు. ఒక అత్యంత సన్నిహిత ఫ్యామిలీ ఫ్రెండ్ ఇంటికి వెళ్లడాన్ని వక్రీకరించడంపై ఆయన ఆవేదన వ్యక్తం చేశారు. మూడు దశాబ్దాలుగా ఉన్న కుటుంబ సంబంధాలను అడ్డం పెట్టుకుని, ఫోటోలను మిక్స్ చేసి వల్గారిటీని అంటగట్టడం దుర్మార్గమని, ఇలాంటి చిల్లర రాజకీయాలకు లొంగిపోయేది లేదని ఆయన తేల్చి చెప్పారు.

డీప్ ఫేక్ టెక్నాలజీతో కుట్ర.. సైబర్ క్రైమ్ పోలీసులకు ఫిర్యాదు

ఆర్టిఫిషియల్ ఇంటెలిజెన్స్ (AI) వాడి తన రూపాన్ని మార్చి, అసత్యాలను ప్రచారం చేస్తున్న వారిపై ఇప్పటికే సైబర్ క్రైమ్ పోలీసులకు ఫిర్యాదు చేసినట్లు బీఆర్ నాయుడు తెలిపారు. ఎడిటింగ్ కూడా సరిగ్గా చేయలేని వారు ఈ మార్ఫింగ్ వీడియోలను రూపొందించారని ఆయన ఎద్దేవా చేశారు. హిందూ ధర్మం, టీటీడీ పవిత్రత కోసం తాను తీసుకుంటున్న కఠిన నిర్ణయాలను జీర్ణించుకోలేకనే కొందరు తన క్యారెక్టర్‌ను టార్గెట్ చేస్తున్నారని ఆయన విమర్శించారు.

నిజాయితీ నాకు తెలుసు.. తప్పుడు వార్తలను నమ్మకండి

ఈ దుష్ప్రచారం చేస్తున్న వారి మానసిక స్థితి అర్థమవుతోందని, ఫ్యామిలీ ఫ్రెండ్స్‌ను కలవడాన్ని కూడా అపార్థం చేసుకునేలా చిత్రీకరించడం శోచనీయమని ఆయన పేర్కొన్నారు. తన నిజాయితీ ఏంటో తనకు, తన కుటుంబానికి, తనను నమ్మే వారికి తెలుసని బీఆర్ నాయుడు స్పష్టం చేశారు. భక్తులు, ప్రజలు ఇటువంటి ఫేక్ వీడియోలను నమ్మవద్దని కోరారు. చట్టపరంగా ఈ కుట్ర వెనుక ఉన్న వ్యక్తులపై కఠిన చర్యలు తీసుకుంటామని ఆయన హెచ్చరించారు.
#TTD #BRNaidu #DeepFake #CyberCrime #AndhraPradesh #Tirumala #FakeNewsAlert #Politics #SocialMediaControversy

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.