భూ సమస్యల పరిష్కారానికి ‘రెవెన్యూ క్లినిక్’

 పేదలను కార్యాలయాల చుట్టూ తిప్పొద్దు – జిల్లా కలెక్టర్ డాక్టర్‌ ఎస్. వెంకటేశ్వర్

చంద్రగిరి నియోజకవర్గ సమస్యలపై ప్రత్యేక దృష్టి.. ఒకే రోజు 751 అర్జీల స్వీకరణ!

రెవెన్యూ అధికారులకు కలెక్టర్ సీరియస్ వార్నింగ్

భూ సమస్యల పరిష్కారం కోసం వచ్చే పేద ప్రజలను రెవెన్యూ కార్యాలయాల చుట్టూ తిప్పించుకోవద్దని, వారి సమస్యలను నిర్ణీత గడువులోగా పరిష్కరించాలని తిరుపతి జిల్లా కలెక్టర్ డాక్టర్‌ ఎస్. వెంకటేశ్వర్ తహసీల్దార్లను ఆదేశించారు. గురువారం కలెక్టరేట్‌లోని ‘ప్రజా సమస్యల పరిష్కార వేదిక’లో నిర్వహించిన రెవెన్యూ క్లినిక్ సందర్భంగా ఆయన అధికారులకు దిశానిర్దేశం చేశారు.

చంద్రగిరి నియోజకవర్గంపై ప్రత్యేక నిఘా

జిల్లాలో అత్యధికంగా చంద్రగిరి నియోజకవర్గం నుండే రెవెన్యూ అర్జీలు వస్తున్నాయని కలెక్టర్ గుర్తించారు. అందుకే ఈ ప్రత్యేక రెవెన్యూ క్లినిక్‌ను చంద్రగిరి నియోజకవర్గం కోసం కేటాయించినట్లు తెలిపారు.

• వచ్చిన అర్జీలు: మొత్తం 751.

• మండలాల వారీగా: రామచంద్రపురం (216), తిరుపతి రూరల్ (202), పాకాల (110), చంద్రగిరి (106), చిన్నగొట్టిగల్లు (65), ఎర్రవారిపాలెం (52).

1. సాంకేతిక సమస్యలు: వెబ్ ల్యాండ్ (Webland) కరెక్షన్, మ్యుటేషన్, అసైన్మెంట్ ల్యాండ్, మరియు సర్వే బౌండరీల వంటి విషయాల్లో అధికారులు అత్యంత జాగ్రత్తగా వ్యవహరించాలి.

2. ప్రజల నమ్మకం: రెవెన్యూ శాఖపై ప్రజలకు నమ్మకం కలిగేలా అధికారులు పనిచేయాలి. అర్జీదారులకు సమస్య స్థితిని వివరంగా చెప్పి, వారి సంతృప్తి మేరకు పరిష్కారం చూపాలి.

3. రాజముద్ర పాసుపుస్తకాలు: రైతులకు కొత్తగా ‘రాజముద్ర’తో కూడిన పట్టాదారు పాసుపుస్తకాలను పంపిణీ చేసే ముందు, అందులోని వివరాలన్నీ సరిగ్గా ఉన్నాయో లేదో మరోసారి సరిచూసుకోవాలి.

4. నిషేధిత జాబితా: 22-A (నిషేధిత భూములు) జాబితా నుండి తొలగించిన భూములకు సంబంధించి రైతులకు వెంటనే ప్రొసీడింగ్ కాపీలను అందజేయాలని సూచించారు.

నిర్ణీత గడువులోగా పరిష్కారం

ఏ రోజు అర్జీలను ఆ రోజే పరిష్కరించేలా చూడాలని, టైమ్ లైన్ దాటకుండా తహసీల్దార్లు వ్యక్తిగత బాధ్యత తీసుకోవాలని కలెక్టర్ స్పష్టం చేశారు. అనంతరం నిషేధిత జాబితా నుండి తొలగించిన భూముల ప్రొసీడింగ్ కాపీలను రైతులకు కలెక్టర్ స్వయంగా అందజేశారు.

ఈ కార్యక్రమంలో డిఆర్ఓ నరసింహులు, స్పెషల్ డిప్యూటీ కలెక్టర్లు దేవేంద్ర రెడ్డి, సుధారాణి, రోస్మాండ్, తిరుపతి ఆర్డిఓ రామ్మోహన్, ఏడి సర్వేర్ అరుణ్ కుమార్ మరియు వివిధ మండలాల తహసీల్దార్లు పాల్గొన్నారు.

#TirupatiCollector #RevenueClinic #LandIssues #Chandragiri #Webland #Mutation #PattadarPassbooks #AndhraPradeshRevenue #FarmersSupport #TirupatiNews

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.