- యుద్ధవాతావరణంలో ఉలిక్కిపడిన రష్యా సరిహద్దులు!
రష్యా, ఉక్రెయిన్ మధ్య పరిస్థితులు అంత తేలికగా లేవు. యుద్ధప్రాంతంగా మారిన కుర్స్క్ ప్రాంతంలో, రాత్రిపూట ఆకస్మికంగా ఓ డ్రోన్ హల్‌చల్‌ చేసింది. ఈ డ్రోన్ ఎవరిని టార్గెట్ చేసింది? ఎందుకు అప్పుడే ఎగిరింది? అనే అంశాలు మరుసటి రోజు పత్రికల్లో సంచలనం అయ్యాయి. ఉక్రెయిన్ దేశం రష్యా అధ్యక్షుడు వ్లాదిమిర్‌ పుతిన్ హెలికాఫ్టర్‌ను లక్ష్యంగా చేసిందా? అన్నదే ఇప్పుడు ప్రపంచవ్యాప్తంగా చర్చనీయాంశంగా మారింది.
రష్యా అధికారుల ప్రకారం, అధ్యక్షుడు పుతిన్ ప్రయాణిస్తున్న హెలికాఫ్టర్ దారిలోకి ఓ ఉక్రెయిన్ డ్రోన్ వచ్చినట్లు గుర్తించి, వెంటనే వాయుసేన వ్యవస్థలు దాన్ని ఆపేశాయి. ఈ సంఘటన కుర్స్క్ ప్రాంతంలో ఆయన పర్యటన సందర్భంగా, రాత్రిపూట జరిగింది.
“అధ్యక్షుడి హెలికాఫ్టర్ ప్రయాణ దారిలోకి ఓ డ్రోన్ దగ్గర పడుతుండగా, మేము వెంటనే తగిన చర్యలు తీసుకుని దాన్ని కూల్చేశాం,” అని ఓ రష్యన్ సీనియర్ అధికారి మీడియాకు తెలిపారు.
ఈ సంఘటనలో ఎవరికి గాయాలు కాలేదు. పుతిన్ కాన్వాయ్ నిరాటంకంగా ముందుకు సాగింది. అయినప్పటికీ, ఈ ఘటన ఉక్రెయిన్ డ్రోన్ సామర్థ్యం, రష్యా గగనతల భద్రతపై పెద్ద ఎత్తున ప్రశ్నలను రేపుతోంది. ఇది హత్యాయత్నమా? లేక మానసిక యుద్ధాన్ని ప్రేరేపించేందుకు ఉద్దేశించిన ‘సైకలాజికల్‌ ఆపరేషన్’లా? అనే అంశంపై అధికారులు దర్యాప్తు చేస్తున్నారు.
ఉక్రెయిన్ ప్రభుత్వం దీనిపై ఎటువంటి అధికారిక ప్రకటన విడుదల చేయలేదు. అయినప్పటికీ, గతంలో రష్యా యొక్క కీలక మౌలికసదుపాయాలపై, సైనిక స్థావరాలపై ఉక్రెయిన్ దాడులు చేసిన సంగతి తెలిసిందే. 2024 ఆగస్టులో ఉక్రెయిన్ ఆకస్మికంగా కుర్స్క్‌లోకి ప్రవేశించడం క్రెమ్లిన్‌పై ఓ చిహ్నాత్మక దెబ్బగా పరిగణించబడింది. ఏప్రిల్ 26న రష్యా అక్కడ పూర్తి నియంత్రణ కలిగి ఉందని ప్రకటించినా, ఉక్రెయిన్ మాత్రం ఆ విషయాన్ని తిరస్కరిస్తూనే ఉంది.
