మెల్‌బోర్న్‌లో మహాత్మా గాంధీ కాంస్య విగ్రహం చోరీ.. పాదాల వద్ద కత్తిరించి ఎత్తుకెళ్లిన దుండగులు!

ఆస్ట్రేలియాలోని మెల్‌బోర్న్ నగరంలో మహాత్మా గాంధీ విగ్రహం చోరీకి గురైన ఘటన స్థానిక భారతీయ సమాజంలో తీవ్ర కలకలం రేపుతోంది. మెల్‌బోర్న్ సబర్బ్ రోవ్‌విల్‌లోని ఆస్ట్రేలియన్ ఇండియన్ కమ్యూనిటీ సెంటర్ వెలుపల ఏర్పాటు చేసిన సుమారు 420 కిలోల బరువైన కాంస్య విగ్రహాన్ని గుర్తుతెలియని వ్యక్తులు ఎత్తుకెళ్లారు. జనవరి 12వ తేదీ అర్ధరాత్రి దాటిన తర్వాత ముగ్గురు దుండగులు ఈ ఘాతుకానికి పాల్పడినట్లు తాజాగా వెలుగులోకి వచ్చింది. ఈ ఘటనపై భారతీయ కమ్యూనిటీ ప్రతినిధులు తీవ్ర దిగ్భ్రాంతి వ్యక్తం చేస్తూ పోలీసులకు ఫిర్యాదు చేశారు.

అర్ధరాత్రి కటింగ్ మెషిన్లతో వచ్చి..

జనవరి 12న అర్ధరాత్రి సుమారు 12:50 గంటల సమయంలో ముసుగులు ధరించిన ముగ్గురు వ్యక్తులు కటింగ్ మెషిన్లతో అక్కడికి చేరుకున్నారు. చాలా పక్కాగా ప్లాన్ చేసిన దుండగులు, గాంధీ విగ్రహాన్ని పాదాల వద్ద కత్తిరించి వేరు చేశారు. సీసీటీవీ దృశ్యాల ప్రకారం.. విగ్రహాన్ని బేస్ నుంచి విడదీసిన అనంతరం వారు తెచ్చుకున్న వైట్ కలర్ వ్యాన్‌లో ఎక్కించుకుని అక్కడి నుంచి పరారయ్యారు. ప్రస్తుతం అక్కడ కేవలం విగ్రహానికి సంబంధించిన కాళ్లు మాత్రమే మిగిలి ఉండటం చూసి స్థానికులు ఆవేదన చెందుతున్నారు.

భారత ప్రభుత్వం అందజేసిన అరుదైన బహుమతి

చోరీకి గురైన ఈ కాంస్య విగ్రహం న్యూఢిల్లీలోని ఇండియన్ కౌన్సిల్ ఫర్ కల్చరల్ రిలేషన్స్ (ICCR) నుంచి ఆస్ట్రేలియన్ ఇండియన్ కమ్యూనిటీకి బహుమతిగా అందింది. 2021 నవంబర్ 12న అప్పటి ఆస్ట్రేలియా ప్రధాని స్కాట్ మోరిసన్ స్వయంగా ఈ విగ్రహాన్ని ఆవిష్కరించారు. భారత్-ఆస్ట్రేలియా దేశాల మధ్య ఉన్న సాంస్కృతిక సంబంధాలకు ప్రతీకగా ఉన్న ఈ విగ్రహాన్ని దొంగిలించడం వెనుక దుండగుల ఉద్దేశం ఏమిటనేది ఇంకా తెలియరాలేదు.

రంగంలోకి దిగిన నాక్స్ క్రైమ్ ఇన్వెస్టిగేషన్ యూనిట్

ఈ చోరీపై ఆస్ట్రేలియన్ ఇండియన్ కమ్యూనిటీ చారిటబుల్ ట్రస్ట్ సభ్యుడు సంతోష్ కుమార్ ఫిర్యాదు చేయడంతో విక్టోరియా పోలీసులు దర్యాప్తు ప్రారంభించారు. నాక్స్ క్రైమ్ ఇన్వెస్టిగేషన్ యూనిట్ ఈ కేసును ప్రతిష్టాత్మకంగా తీసుకుంది. భారీ బరువైన కాంస్య విగ్రహం కావడంతో, దీనిని స్క్రాప్ మెటల్ డీలర్ల వద్ద విక్రయించే అవకాశం ఉందని పోలీసులు అనుమానిస్తున్నారు. ఈ క్రమంలో మెటల్ డీలర్లందరినీ అప్రమత్తం చేసి, ఎవరైనా బ్రాంజ్ విగ్రహంతో వస్తే వెంటనే సమాచారం ఇవ్వాలని కోరారు.
#MahatmaGandhi #Melbourne #Australia #StatueTheft #IndianCommunity #VictoriaPolice #GlobalNews #GandhiStatue #CrimeNews

Saran Kumar Thalapula