పాక్లో షియా మసీదుపై ఆత్మాహుతి దాడి.. 31 మంది మృతి, 169 మందికి గాయాలు!
పాకిస్థాన్ రాజధాని ఇస్లామాబాద్లో ఘోర కలికలం రేగింది. శుక్రవారం ప్రార్థనల సమయంలో ఒక షియా మసీదుపై జరిగిన ఆత్మాహుతి దాడిలో మృతుల సంఖ్య భారీగా పెరిగింది. తాజా సమాచారం ప్రకారం ఈ ఘటనలో 31 మంది ప్రాణాలు కోల్పోగా, 169 మందికి పైగా గాయపడ్డారు.
పాకిస్థాన్ రాజధాని ఇస్లామాబాద్లోని తర్లాయ్ కలాన్ ప్రాంతంలో గల ‘ఖదీజాతుల్ కుబ్రా’ మసీదు (ఇమామ్బార్గా) లక్ష్యంగా శుక్రవారం మధ్యాహ్నం భీకర ఆత్మాహుతి దాడి జరిగింది. ప్రార్థనల కోసం భక్తులు మసీదులో కిక్కిరిసి ఉన్న సమయంలో ఈ పేలుడు సంభవించింది. ఆత్మాహుతి బాంబర్ను గేటు వద్దే అడ్డుకున్నప్పటికీ, అతను తనను తాను పేల్చుకోవడంతో పెను వినాశనం చోటుచేసుకుంది. ఈ దాడిలో ఇప్పటివరకు 31 మంది మరణించినట్లు అధికారిక వర్గాలు ధృవీకరించాయి. క్షతగాత్రుల సంఖ్య 169 దాటడంతో ఇస్లామాబాద్లోని ప్రధాన ఆసుపత్రుల్లో అత్యవసర పరిస్థితిని ప్రకటించారు.
ఈ ఘటనకు సంబంధించిన వివరాల ప్రకారం.. షెహజాద్ టౌన్ ఏరియాలోని తర్లాయ్ ప్రాంతంలో ఉన్న ఈ మసీదుకు ప్రార్థనల కోసం వందలాది మంది తరలివచ్చారు. అనుమానాస్పదంగా లోపలికి వెళ్లేందుకు ప్రయత్నించిన దుండగుడిని గేటు వద్దే భద్రతా సిబ్బంది అడ్డుకున్నారు. అయితే, నిందితుడు ఒక్కసారిగా పేలుడు పదార్థాలను పేల్చుకోవడంతో గేటు వద్ద ఉన్న వారు అక్కడికక్కడే ప్రాణాలు కోల్పోయారు. పేలుడు తీవ్రతకు మసీదు కిటికీలు ధ్వంసమవడమే కాకుండా, పరిసరాల్లోని వాహనాలు కూడా దెబ్బతిన్నాయి. క్షతగాత్రులను పాకిస్థాన్ ఇన్స్టిట్యూట్ ఆఫ్ మెడికల్ సైన్సెస్ (PIMS) మరియు పాలిక్లినిక్ ఆసుపత్రులకు తరలించారు. వీరిలో పలువురి పరిస్థితి విషమంగా ఉన్నట్లు సమాచారం.
పాకిస్థాన్లో ఇటీవలి కాలంలో మైనారిటీ షియా వర్గాలను లక్ష్యంగా చేసుకుని తీవ్రవాద సంస్థలు దాడులను తీవ్రతరం చేశాయి. ఇస్లామాబాద్ వంటి అత్యంత భద్రత ఉండే రాజధాని నగరంలోనే ఇలాంటి భారీ దాడి జరగడం భద్రతా వైఫల్యంగా భావిస్తున్నారు. ప్రస్తుతం ఉజ్బెకిస్థాన్ అధ్యక్షుడు షావ్కత్ మిర్జియోయెవ్ పాకిస్థాన్ పర్యటనలో ఉన్న సమయంలోనే ఈ ఘోరం జరగడం గమనార్హం. ఈ దాడికి తామే బాధ్యులమని ఇప్పటి వరకు ఏ సంస్థ ప్రకటించనప్పటికీ, ‘ఫిత్నా అల్ ఖ్వారాజీ’ (TTP) అనుబంధ సంస్థల ప్రమేయం ఉండవచ్చని పోలీసులు అనుమానిస్తున్నారు. పాక్ అధ్యక్షుడు ఆసిఫ్ అలీ జర్దారీ, ప్రధాని షెహబాజ్ షరీఫ్ ఈ పిరికిపంద చర్యను తీవ్రంగా ఖండించారు.
#IslamabadBlast #PakistanTerrorAttack #ShiaMosque #BreakingNews #Tarlai #IslamabadPolice
Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.
