పశ్చిమాసియాలో ముదురుతున్న యుద్ధం..

ఇజ్రాయెల్ అణు కేంద్రంపై ఇరాన్ క్షిపణి దాడులు!

పశ్చిమాసియాలో యుద్ధ జ్వాలలు మరింత భయంకరంగా మారుతున్నాయి. తాజాగా ఇజ్రాయెల్‌పై ఇరాన్ భీకర దాడులకు తెగబడింది. డిమోనా నగరంలోని ఇజ్రాయెల్‌కు అత్యంత కీలకమైన అణు పరిశోధనా కేంద్రాన్ని లక్ష్యంగా చేసుకుని బాలిస్టిక్ క్షిపణులతో విరుచుకుపడటం అంతర్జాతీయంగా తీవ్ర కలకలం రేపుతోంది.

నతాంజ్‌ దాడికి ప్రతీకారంగా.. శనివారం ఇరాన్‌లోని ప్రధాన అణుశుద్ధి కేంద్రమైన ‘నతాంజ్’పై జరిగిన దాడులకు ప్రతీకారంగానే ఇరాన్ ఈ చర్యకు పాల్పడినట్లు సమాచారం. ఇరాన్ ప్రయోగించిన రెండు బాలిస్టిక్ క్షిపణులను అడ్డుకోవడంలో ఇజ్రాయెల్ గగనతల రక్షణ వ్యవస్థలు విఫలమవడంతో, అవి నేరుగా అరాద్, డిమోనా నగరాల్లోని నివాస ప్రాంతాలపై పడ్డాయి. అణు పరిశోధన కేంద్రం సమీపంలోని భవనాలు దెబ్బతిన్నప్పటికీ, ప్రధాన కేంద్రానికి ఎలాంటి నష్టం వాటిల్లలేదని ప్రాథమిక సమాచారం.

ఇరాన్ పై యుద్ధాన్ని ముగిస్తున్నట్లా? ముసురుతున్నట్లా? ఈ వార్తను కూడా చదవండి

పౌర నివాసాలపై క్షిపణుల వర్షం ఈ దాడుల్లో ఇజ్రాయెల్ పౌరులు భారీగా గాయపడ్డారు.

అరాద్ నగరం: ఇక్కడ జరిగిన దాడిలో సుమారు 88 మంది గాయపడగా, వారిలో 10 మంది పరిస్థితి విషమంగా ఉన్నట్లు తెలుస్తోంది. సుమారు 150 కుటుంబాలను అధికారులు సురక్షిత ప్రాంతాలకు తరలించారు.
డిమోనా నగరం: నివాస భవనంపై క్షిపణి పడటంతో 40 మందికి పైగా గాయపడ్డారు. బాధితుల్లో 10 ఏళ్ల బాలుడు కూడా ఉండటం విషాదకరం. భవన శిథిలాల కింద మరికొందరు చిక్కుకుని ఉండవచ్చని అధికారులు ఆందోళన వ్యక్తం చేస్తున్నారు.

ప్రతీకారం తీర్చుకుంటాం: నెతన్యాహు ఈ దాడులను ఇజ్రాయెల్ ప్రధానమంత్రి బెంజమిన్ నెతన్యాహు తీవ్రంగా ఖండించారు. గాయపడిన వారికి మెరుగైన వైద్యం అందించాలని అధికారులను ఆదేశించారు. తమ దేశ సార్వభౌమాధికారంపై జరిగిన ఈ దాడిని ఊరికే వదలబోమని, దీనికి తగిన రీతిలో ప్రతీకారం తీర్చుకుంటామని ఇరాన్‌ను ఆయన హెచ్చరించారు. దీంతో ఇరు దేశాల మధ్య యుద్ధం అణు యుద్ధానికి దారితీస్తుందా అన్న ఆందోళన ప్రపంచ దేశాల్లో వ్యక్తమవుతోంది.

IsraelUnderAttack #IranMissileAttack #Dimona #WestAsiaWar #Netanyahu #WorldNews #ConflictUpdate #IsraelIranWar

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.