- రేవంత్–ఖర్గే–రాహుల్ భేటీతో వేడి రాజకీయం
- మంత్రుల శాఖలతో పాటు టీపీసీసీ కూర్పుపై చర్చలు ఊపందుకున్నాయి
న్యూఢిల్లీ:తెలంగాణలో ఇటీవల క్యాబినెట్ విస్తరణ (cabinet expansion) అనంతరం నూతన మంత్రుల శాఖలపై ఇంకా స్పష్టత రాకపోవడం రాజకీయంగా చర్చనీయాంశంగా మారింది. చెన్నూరు ఎమ్మెల్యే గడ్డం వివేక్ వెంకటస్వామి, ధర్మపురి ఎమ్మెల్యే అడ్లూరి లక్ష్మణ్, మక్తల్ ఎమ్మెల్యే వాకిటి శ్రీహరి ఆదివారం ప్రమాణ స్వీకారం చేసినా, వారి శాఖల కేటాయింపు ఇంకా వెలుగులోకి రాలేదు.
ఈ విషయంపై ముఖ్యమంత్రి రేవంత్ రెడ్డి మూడు రోజులుగా ఢిల్లీలోనే ఉన్నారు. నిన్న రాత్రి డిప్యూటీ సీఎం భట్టి విక్రమార్క మరియు సీనియర్ మంత్రి ఉత్తమ్ కుమార్ రెడ్డికి ఢిల్లీ హైకమాండ్ నుంచి ఆకస్మిక పిలుపు రావడం సరికొత్త ఊహాగానాలకు తావిస్తోంది. ఇది కేవలం మంత్రుల శాఖల కేటాయింపు మాత్రమే కాకుండా, టీపీసీసీ (TPCC) కార్యవర్గ కూర్పు, పనిచేస్తున్న మంత్రుల శాఖల మార్పులు వంటి కీలక అంశాలపై చర్చలు జరుగుతున్న సూచనగా రాజకీయ విశ్లేషకులు భావిస్తున్నారు.
మల్లికార్జున ఖర్గే, రాహుల్ గాంధీతో రేవంత్ భేటీ
రేవంత్ రెడ్డి ఢిల్లీలో ఏఐసీసీ అధ్యక్షుడు మల్లికార్జున ఖర్గే, లోక్‌సభలో ప్రతిపక్ష నేత రాహుల్ గాంధీతో భేటీ అయినట్లు కాంగ్రెస్ వర్గాలు వెల్లడించాయి. ముఖ్యమంత్రి వద్ద ప్రస్తుతం ఉన్న హోం, ఎడ్యుకేషన్, మున్సిపల్, మైనింగ్, ఎస్సీ, ఎస్టీ, మైనార్టీ వెల్ఫేర్, లా, లేబర్, కమర్షియల్ ట్యాక్స్, యువజన–స్పోర్ట్స్ శాఖల్లో కొన్ని ఇతర మంత్రులకు కేటాయించాలన్నది అధిష్ఠాన ఆలోచనగా తెలుస్తోంది. ఈ నిర్ణయం అమలైతే డిప్యూటీ సీఎం సహా కీలక మంత్రుల శాఖల్లో మార్పులు ఖాయంగా కనిపిస్తున్నాయి.
వర్కింగ్ ప్రెసిడెంట్ల పై కూడా నిర్ణయం తేలే సూచనలు
ఇటీవల ప్రకటించిన ఐదు టీపీసీసీ కమిటీలలో 27 మంది ఉపాధ్యక్షులు, 69 మంది ప్రధాన కార్యదర్శులకు అవకాశం ఇవ్వగా, త్వరలోనే వర్కింగ్ ప్రెసిడెంట్ల (Working Presidents) లిస్ట్‌పై క్లారిటీ వచ్చే అవకాశం ఉందని సమాచారం. రాష్ట్ర కాంగ్రెస్‌లో సమీకరణాల ఆధారంగా ఈ నిర్ణయాలు రూపొందించే పనిలో అధిష్ఠానం నిమగ్నమై ఉన్నట్టు తెలుస్తోంది.
