PY Reddy 
Lakshmi MS, Tirupati 
అంతర్జాతీయ ప్రమాణాలతో ఫిషింగ్ హార్బర్ల ఆధునీకరణ: మంత్రి
రాష్ట్రంలోని తీరప్రాంత మత్స్యకారుల జీవనోపాధిని మెరుగుపరిచేందుకు కూటమి ప్రభుత్వం ఫిషింగ్ హార్బర్లు, ఫిష్ ల్యాండింగ్ సెంటర్ల అభివృద్ధిపై ప్రత్యేక దృష్టి సారించింది. పీఎంఎంఎస్వై, సాగరమాల వంటి కేంద్ర పథకాల సహకారంతో హార్బర్లను అంతర్జాతీయ ప్రమాణాలకు అనుగుణంగా తీర్చిదిద్దుతున్నట్లు వ్యవసాయ, మత్స్యశాఖ మంత్రి కింజరాపు అచ్చెన్నాయుడు ప్రకటించారు. శాసనసభలో పెందుర్తి ఎమ్మెల్యే పంచకర్ల రమేష్ బాబు అడిగిన ప్రశ్నకు సమాధానంగా రాష్ట్రవ్యాప్తంగా సాగుతున్న ప్రాజెక్టుల పురోగతిని మంత్రి వివరించారు. ఆంధ్రప్రదేశ్ లోని 1053 కిలోమీటర్ల సుదీర్ఘ తీరప్రాంతాన్ని ఆర్థిక చోదక శక్తిగా మార్చేందుకు ప్రభుత్వం కట్టుబడి ఉందని ఆయన స్పష్టం చేశారు.
రెండు దశల్లో హార్బర్ల నిర్మాణం.. ముమ్మరంగా పనులు
రాష్ట్రవ్యాప్తంగా 10 ఫిషింగ్ హార్బర్ల నిర్మాణాన్ని ప్రభుత్వం ప్రతిష్టాత్మకంగా చేపట్టింది. మొదటి దశలో భాగంగా జువ్వలదిన్నె, ఉప్పాడ, మచిలీపట్నం, నిజాంపట్నం హార్బర్ల పనులు వేగంగా జరుగుతున్నాయి. రెండో దశలో బుడగట్లపాలెం, పూడిమడక, కొత్తపట్నం, వోడరేవు హార్బర్ల ఏర్పాటుకు ప్రతిపాదనలు సిద్ధమయ్యాయి. వీటితో పాటు విశాఖపట్నం హార్బర్ ఆధునీకరణ పనులను రూ.178.51 కోట్లతో, కాకినాడ హార్బర్ ఆధునీకరణకు రూ.58.95 కోట్లతో ప్రణాళికలు రూపొందించినట్లు మంత్రి వివరించారు.
ముత్యాలమ్మపాలెం మినీ జెట్టిపై ప్రత్యేక అధ్యయనం
పరవాడ మండలం ముత్యాలమ్మపాలెం గ్రామస్తుల చిరకాల కోరికైన మినీ జెట్టి/ఫిష్ ల్యాండింగ్ సెంటర్ నిర్మాణంపై ప్రభుత్వం సానుకూలంగా స్పందించింది. దీనిపై ఇప్పటికే CICEF ద్వారా ప్రీ-ఫీజిబిలిటీ అధ్యయనం పూర్తయిందని, తుది నివేదిక అందాల్సి ఉందని మంత్రి తెలిపారు. ఈ నివేదిక అందిన వెంటనే సాంకేతిక సాధ్యతలను పరిశీలించి, మినీ జెట్టి నిర్మాణానికి అవసరమైన తదుపరి చర్యలు వేగవంతం చేస్తామని ఎమ్మెల్యే పంచకర్ల రమేష్ బాబుకు మంత్రి హామీ ఇచ్చారు.
రూ. 126 కోట్లతో ఫిష్ ల్యాండింగ్ సెంటర్ల అభివృద్ధి
మత్స్యకారులకు గిట్టుబాటు ధర, మెరుగైన మౌలిక వసతులు కల్పించేందుకు పీఎంఎంఎస్వై కింద రూ.126.91 కోట్లతో పలు ప్రాంతాల్లో ఫిష్ ల్యాండింగ్ సెంటర్లను (FLC) అభివృద్ధి చేస్తున్నారు. దొండువాక, ఉప్పలంక, భీమిలి, రాజయ్యపేట, చింతపల్లి, రాయదరువు ప్రాంతాల్లో ఈ సెంటర్ల ఏర్పాటుకు టెండర్ల ప్రక్రియ కొనసాగుతోంది. మచిలీపట్నం, బియ్యపుతిప్పలో పనులు పురోగతిలో ఉన్నాయని, ఇవి పూర్తయితే మత్స్య రంగానికి కొత్త ఊపు వస్తుందని మంత్రి ధీమా వ్యక్తం చేశారు.
#AndhraPradesh #FisheriesDevelopment #PMMSY #Sagarmala #APPolitics #CoastalDevelopment #Atchannaidu #VizagHarbor #BlueEconomy
