తిరుమల క్యూలైన్లో కిలేడీ దందా: మత్తు ఇచ్చి తాళిబొట్టు చోరీ చేసిన మహిళ అరెస్ట్!
తిరుమల క్యూలైన్లో కిలేడీ దందా: మత్తు ఇచ్చి తాళిబొట్టు చోరీ చేసిన మహిళ అరెస్ట్!
సర్వదర్శనం క్యూలైనే లక్ష్యం.. వృద్ధురాలిని మభ్యపెట్టి మత్తు మాత్ర ఇచ్చి 60 గ్రాముల బంగారు చైన్తో పరారైన నిందితురాలు ఏడుకొండల వాడి చెంతనే పోలీసులకు చిక్కింది.
పరిచయం పెంచుకుని ‘మత్తు’ వల.. వృద్ధురాలికి ఊహించని షాక్
పవిత్ర పుణ్యక్షేత్రం తిరుమలలో భక్తుల ముసుగులో తిరుగుతున్న ఓ అంతర్రాష్ట్ర దొంగను తిరుమల I టౌన్ పోలీసులు చాకచక్యంగా అదుపులోకి తీసుకున్నారు. తిరుపతికి చెందిన రాధాకృష్ణ విజయ (63) అనే వృద్ధురాలు ఈ నెల 2వ తేదీన వైకుంఠ ద్వార దర్శనం కోసం తిరుమలకు రాగా, క్యూలైన్లో నిందితురాలు నాగిశెట్టి నాగరత్నమ్మ ఆమెకు పరిచయమైంది. జనవరి 3న వైకుంఠం క్యూలైన్ కాంప్లెక్స్-IIలోని 20వ నంబర్ కంపార్ట్మెంట్లో ఉండగా, నాగరత్నమ్మ బాధితురాలికి మత్తు మాత్ర ఇచ్చింది. వృద్ధురాలు స్పృహ కోల్పోయిన వెంటనే ఆమె మెడలోని 60 గ్రాముల బంగారు తాళిబొట్టు చైన్ను దొంగిలించి నిందితురాలు మాయమైంది.
బాధితురాలు కోలుకున్నాక జరిగిన దారుణాన్ని గుర్తించి పోలీసులకు ఫిర్యాదు చేయడంతో రంగంలోకి దిగిన పోలీసులు బి.ఎన్.ఎస్ (BNS) సెక్షన్ల కింద కేసు నమోదు చేశారు. ఈ ఘటన తిరుమలలోని భద్రతా ఏర్పాట్లపై చర్చకు దారితీయడంతో జిల్లా ఎస్పీ సుబ్బరాయుడు ఐపీఎస్ ఈ కేసును సీరియస్గా తీసుకున్నారు. నిందితురాలిని పట్టుకోవడానికి సీసీటీవీ ఫుటేజీలు, సాంకేతిక ఆధారాలను విశ్లేషించిన పోలీసు బృందాలు భక్తుల రద్దీని అడ్డుపెట్టుకుని తప్పించుకు తిరుగుతున్న నాగరత్నమ్మ కదలికలను ఎట్టకేలకు గుర్తించాయి.
సీసీటీవీల నీడలో నిందితురాలు.. కోలార్ కిలేడీ కథ సుఖాంతం
తిరుమల ఎస్ఐ చలపతి నేతృత్వంలోని బృందం శనివారం (10-01-2026) హెచ్టీ కాంప్లెక్స్ సమీపంలో నిందితురాలిని అదుపులోకి తీసుకుంది. నిందితురాలు నాగరత్నమ్మ కర్ణాటక రాష్ట్రం కోలారు జిల్లాకు చెందినదిగా గుర్తించారు. ఆమె వద్ద నుంచి సుమారు 57 గ్రాముల బరువున్న బంగారు తాళిబొట్టు చైన్ను (పతకం, గిన్నె బొట్టు, మామిడి పండు తదితర ఆభరణాలతో సహా) స్వాధీనం చేసుకున్నారు. విచారణలో ఆమె భక్తులను మభ్యపెట్టి ఇలాంటి దొంగతనాలకు పాల్పడుతున్నట్లు తేలడంతో, పోలీసులు ఆమెను రిమాండ్కు తరలించారు.
ఈ కేసును వేగంగా ఛేదించిన సిబ్బందిని ఎస్పీ సుబ్బరాయుడు ప్రత్యేకంగా అభినందించారు. తిరుమలకు వచ్చే భక్తులు, ముఖ్యంగా ఒంటరిగా ఉండే వృద్ధ మహిళలు అపరిచితులు ఇచ్చే ఆహార పదార్థాలు లేదా మాత్రలను స్వీకరించవద్దని పోలీసులు హెచ్చరించారు. క్యూలైన్లలో ఎవరైనా అనుమానాస్పదంగా కనిపిస్తే వెంటనే 112 నంబర్కు సమాచారం ఇవ్వాలని సూచించారు. నిరంతర నిఘా ఉన్నప్పటికీ దొంగలు కొత్త ఎత్తుగడలతో వస్తున్నారని, భక్తుల అప్రమత్తతే వారి సొత్తుకు రక్షణ అని పోలీసులు స్పష్టం చేశారు.
#TirumalaPolice #CrimeNews #GoldTheftCase #PilgrimSafety #PoliceAction
