Saran Kumar Thalapula 
PY Reddy 
మధ్యప్రదేశ్ శాసనసభలో అధికార, ప్రతిపక్షాల మధ్య సాగుతున్న వాగ్వాదం శృతిమించి చివరకు సభ్య సమాజం తలదించుకునే స్థాయికి చేరింది. రాష్ట్ర పార్లమెంటరీ వ్యవహారాల మంత్రి కైలాష్ విజయవర్గియా సభలో సహనం కోల్పోయి, ప్రతిపక్ష నేత ఉమంగ్ సింఘార్ను ఉద్దేశించి తీవ్రమైన ‘అసభ్య’ పదజాలాన్ని ఉపయోగించారు. ఈ ఘటనతో సభ ఒక్కసారిగా అట్టుడికిపోయింది. తన మంత్రి చేసిన తప్పును సరిదిద్దే ప్రయత్నంలో ముఖ్యమంత్రి మోహన్ యాదవ్ స్వయంగా జోక్యం చేసుకుని, సభకు బేషరతుగా క్షమాపణలు చెప్పాల్సి వచ్చింది. ప్రజాస్వామ్య దేవాలయంలో ఇలాంటి భాష వాడటం గర్హనీయమని విపక్షాలు మండిపడుతున్నాయి.
అదానీ ఒప్పందం సెగ.. అసలు ఏం జరిగిందంటే?
గురువారం అసెంబ్లీలో గవర్నర్ ప్రసంగానికి ధన్యవాదాలు తెలిపే తీర్మానంపై చర్చ జరుగుతున్న సమయంలో ఈ గందరగోళం మొదలైంది. ప్రతిపక్ష నేత ఉమంగ్ సింఘార్ సింగ్రౌలీలో ప్రభుత్వం మరియు అదానీ గ్రూప్ మధ్య జరిగిన విద్యుత్ కొనుగోలు ఒప్పందాన్ని ప్రస్తావించారు. వచ్చే 25 ఏళ్లలో ప్రభుత్వం ఆ సంస్థకు ఏకంగా రూ. 1.25 లక్షల కోట్లు చెల్లించేందుకు రంగం సిద్ధం చేసిందని, ఇది ప్రజల సొమ్మును దోచిపెట్టడమేనని ఆయన తీవ్రస్థాయిలో ఆరోపించారు. ఈ ఆరోపణలను ఖండించే క్రమంలో మంత్రి విజయవర్గియా ఒక్కసారిగా ఆవేశానికి లోనయ్యారు. ప్రతిపక్ష నేత స్థాయిని కించపరిచేలా పార్లమెంటరీ విరుద్ధమైన పదాలను ఉపయోగించడంతో కాంగ్రెస్ సభ్యులు వెల్లోకి దూసుకెళ్లి నిరసన వ్యక్తం చేశారు.
పరిస్థితి విషమించడంతో స్పీకర్ నరేంద్ర సింగ్ తోమర్ రంగంలోకి దిగి సభ్యులను శాంతింపజేసే ప్రయత్నం చేశారు. మంత్రి వాడిన అనుచిత పదాలను సభ రికార్డుల నుంచి తక్షణమే తొలగిస్తున్నట్లు స్పీకర్ ప్రకటించారు. సభలో గౌరవప్రదమైన భాషను వాడాలని, ముఖ్యంగా బాధ్యతాయుతమైన పదవుల్లో ఉన్న వారు సంయమనం పాటించాలని హెచ్చరించారు. ముఖ్యమంత్రి మోహన్ యాదవ్ మాట్లాడుతూ జరిగిన దానికి తాను చింతిస్తున్నానని, సభ గౌరవాన్ని కాపాడటం అందరి బాధ్యతని పేర్కొన్నారు. తన తరఫున మరియు ప్రభుత్వం తరఫున విచారం వ్యక్తం చేస్తున్నానని చెప్పడంతో వివాదం కొంత సద్దుమణిగింది. ఆ తర్వాత మంత్రి విజయవర్గియా కూడా తన వ్యాఖ్యలను వెనక్కి తీసుకుంటున్నట్లు ప్రకటించి పశ్చాత్తాపం వ్యక్తం చేశారు.
రాజకీయ విశ్లేషణ.. హుందాతనం ఎక్కడ?
శాసనసభలో ప్రజా సమస్యలపై చర్చ జరగాల్సిన చోట వ్యక్తిగత దూషణలకు దిగడం సభ్యుల హుందాతనాన్ని ప్రశ్నిస్తోంది. అదానీ గ్రూప్తో జరిగిన భారీ ఆర్థిక ఒప్పందంపై ప్రతిపక్షం అడిగిన ప్రశ్నలకు సమాధానం చెప్పాల్సిన బాధ్యత ప్రభుత్వంపై ఉంటుంది. అయితే ఆ ప్రశ్నలను అడ్డుకునే క్రమంలో అసభ్య పదజాలం వాడటం వల్ల చర్చ దారి మళ్లింది. ఇటు ప్రతిపక్ష నేత ఉమంగ్ సింఘార్ కూడా ప్రభుత్వంపై ఆధారాలు లేని ఆరోపణలు చేస్తున్నారని అధికార పక్షం ఆరోపిస్తోంది. ఏది ఏమైనా అసెంబ్లీలో జరిగిన ఈ రచ్చ మధ్యప్రదేశ్ రాజకీయాల్లో తీవ్ర చర్చకు దారితీసింది.
ముఖ్యంగా కైలాష్ విజయవర్గియా వంటి సీనియర్ నేత ఇలాంటి వ్యాఖ్యలు చేయడం పార్టీకి కూడా ఇబ్బందికరంగా మారింది. గతంలో కూడా ఆయన పలుమార్లు వివాదాస్పద వ్యాఖ్యలు చేసి వార్తల్లో నిలిచారు. ఇప్పుడు నేరుగా అసెంబ్లీలోనే ప్రతిపక్ష నేతను టార్గెట్ చేయడం వల్ల ప్రభుత్వం డిఫెన్స్లో పడాల్సి వచ్చింది. ముఖ్యమంత్రి స్వయంగా క్షమాపణలు చెప్పడం వల్ల ప్రస్తుతానికి గొడవ ఆగిపోయినా, రాబోయే రోజుల్లో ఈ విద్యుత్ ఒప్పందంపై ప్రతిపక్షాలు మరింత దూకుడుగా వ్యవహరించే అవకాశం కనిపిస్తోంది. సభలో జరిగిన ఈ పరిణామాలను ప్రజలు గమనిస్తున్నారని, ప్రజాప్రతినిధులు తమ ప్రసంగాల్లో గౌరవాన్ని కాపాడుకోవాలని రాజకీయ విశ్లేషకులు సూచిస్తున్నారు.
Summary: Madhya Pradesh Minister Kailash Vijayvargiya sparked a major row in the state assembly after using an unparliamentary word against Leader of the Opposition (LoP) Umang Singhar. The incident occurred during a debate on the Governor’s address when Singhar raised concerns over a 25-year, ₹1.25 lakh crore electricity purchase deal with the Adani group in Singrauli. Losing his temper, the minister resorted to derogatory language, leading to a massive protest by the opposition. To restore order, Speaker Narendra Singh Tomar expunged the remarks, while Chief Minister Mohan Yadav officially apologized for the minister’s conduct, emphasizing the need for decorum in the House.
#MPAssembly #KailashVijayvargiya #UmangSinghar #AdaniGroup #Politics #MohanYadav #NTVTelugu
Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.
