బంగ్లాదేశ్ ఎన్నికల ఫలితాలు

బంగ్లాదేశ్‌లో సుదీర్ఘకాలంగా కొనసాగుతున్న రాజకీయ ఉత్కంఠకు తెరపడింది. దేశ 13వ సార్వత్రిక ఎన్నికల్లో మాజీ ప్రధాని ఖలీదా జియా నేతృత్వంలోని బంగ్లాదేశ్ నేషనలిస్ట్ పార్టీ (బీఎన్పీ) ప్రభంజనం సృష్టించింది. మొత్తం 299 పార్లమెంటు స్థానాలకు గానూ 209 సీట్లను కైవసం చేసుకుని, మూడింట రెండు వంతుల మెజారిటీతో రెండు దశాబ్దాల తర్వాత మళ్లీ అధికార పీఠాన్ని అధిష్టించబోతోంది. బీఎన్పీ ఛైర్మన్ తారిఖ్ రెహమాన్ (60) దేశ నూతన ప్రధానమంత్రిగా బాధ్యతలు చేపట్టనుండటంతో, బంగ్లాదేశ్‌లో గత 35 ఏళ్లుగా సాగుతున్న మహిళా ప్రధానుల పాలనకు ముగింపు పడనుంది. ఇదే ఎన్నికల్లో మతతత్వ పార్టీ జమాత్-ఏ-ఇస్లామీ 68 స్థానాలతో రెండో స్థానంలో నిలిచి అందరినీ ఆశ్చర్యపరిచింది.

రెండు దశాబ్దాల నిరీక్షణకు ఫలితం

2001 నుండి 2006 వరకు అధికారంలో ఉన్న బీఎన్పీ, ఆ తర్వాత జరిగిన వరుస ఎన్నికల్లో షేక్ హసీనా నేతృత్వంలోని అవామీ లీగ్ చేతిలో పరాజయం పాలవుతూ వచ్చింది. అయితే, 2024 ఆగస్టులో చెలరేగిన విద్యార్థుల ఉద్యమంతో హసీనా ప్రభుత్వం కుప్పకూలడం, మహమ్మద్ యూనస్ నేతృత్వంలోని తాత్కాలిక ప్రభుత్వం ఎన్నికలు నిర్వహించడంతో బీఎన్పీకి మళ్లీ పూర్వవైభవం లభించింది. గురువారం జరిగిన ఈ ఎన్నికల్లో 59.44 శాతం పోలింగ్ నమోదైంది. కేవలం అధికార మార్పిడికే కాకుండా, దేశ భవిష్యత్తును మార్చే 84 పాయింట్ల సంస్కరణల ప్యాకేజీ (జూలై నేషనల్ చార్టర్) పై కూడా ప్రజలు 60.26 శాతం మొగ్గు చూపి ఆమోద ముద్ర వేశారు.

తారిఖ్ రెహమాన్ రాకతో బంగ్లాదేశ్ విదేశాంగ విధానంలో కూడా మార్పులు వచ్చే అవకాశం ఉంది. ముఖ్యంగా రెండో స్థానంలో నిలిచిన జమాత్-ఏ-ఇస్లామీ పార్టీకి పాకిస్థాన్‌తో అత్యంత సన్నిహిత సంబంధాలు ఉండటం గమనార్హం. ఈ నేపథ్యంలో భారత్‌తో సంబంధాలు ఎలా ఉండబోతున్నాయనేది ఇప్పుడు అంతర్జాతీయ స్థాయిలో ఆసక్తికరంగా మారింది. సంస్కరణల ప్యాకేజీ అమలు మరియు ఆర్థిక వ్యవస్థను గాడిలో పెట్టడమే నూతన ప్రధాని ముందున్న తక్షణ సవాలు.

35 ఏళ్ల తర్వాత పురుష ప్రధాని!

బంగ్లాదేశ్ రాజకీయాల్లో ఇది ఒక చారిత్రాత్మక మలుపు. గత 35 ఏళ్లుగా షేక్ హసీనా మరియు ఖలీదా జియా మధ్యే అధికారం మారుతూ, మహిళలే ప్రధానులుగా కొనసాగారు. ఇప్పుడు తారిఖ్ రెహమాన్ ప్రధాని పీఠాన్ని అధిష్టించబోతుండటంతో మూడు దశాబ్దాల తర్వాత ఒక పురుషుడు దేశ బాధ్యతలు చేపట్టబోతున్నారు. ఎన్నికల సంఘం సీనియర్ కార్యదర్శి అహ్మద్ అక్తర్ ఈ ఫలితాలను అధికారికంగా ధృవీకరించారు. విద్యార్థి ఉద్యమ స్ఫూర్తితో వచ్చిన ఈ మార్పు, బంగ్లాదేశ్ ప్రజాస్వామ్యాన్ని ఏ దిశగా తీసుకెళ్తుందో వేచి చూడాలి.

Summary in English: Tarique Rahman is set to become the next Prime Minister of Bangladesh as the Bangladesh Nationalist Party (BNP) secured a landslide victory in the 13th general elections, winning 209 out of 299 parliamentary seats. After two decades in the political wilderness, the BNP returns to power with a two-thirds majority, while the Jamaat-e-Islami emerged as the second-largest party with 68 seats. This election also marks the end of a 35-year streak of female Prime Ministers in the country. Additionally, a 60.26% majority of voters approved the 84-point “July National Charter” reforms in a simultaneous referendum, signaling a new era of governance following the collapse of Sheikh Hasina’s regime in 2024.

PY Reddy

Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.