‘కొణిదెల’కు రూ.50 లక్షలు : మాట నిలుపుకు పవన్ కళ్యాణ్

నంద్యాల: గత అసెంబ్లీ ఎన్నికల ప్రచార సమయంలో కొణిదెల గ్రామాన్ని దత్తత తీసుకుంటానని ఇచ్చిన హామీని డిప్యూటీ సీఎం పవన్ కల్యాణ్ (Pawan Kalyan) నేరవేర్చారు. ఇటీవల కొణిదెల గ్రామాభివృద్ధికి రూ.50 లక్షలు (Rs. 50 lakhs) మంజూరు చేస్తానని ప్రకటించిన పవన్, తాజాగా ఆ నిధులకు సంబంధించిన చెక్కును నంద్యాల కలెక్టర్‌కు స్వయంగా అందజేశారు.

ఈ గ్రామం పవన్ కల్యాణ్ ఇంటిపేరు అయిన ‘కొణిదెల’గా ఉన్నప్పటికీ, వారి కుటుంబానికి ఎలాంటి సంబంధం లేదని గ్రామస్థులు చెబుతున్నారు. ఇది కేవలం యాదృచ్ఛికం (coincidence) మాత్రమేనని వారి అభిప్రాయం. నంద్యాల జిల్లా నందికొట్కూరు నియోజకవర్గంలోని పగిడ్యాల మండలానికి చెందిన కొణిదెల గ్రామాన్ని అభివృద్ధి చేయాలని పవన్ నిర్ణయం తీసుకున్నారు.

పవన్ కల్యాణ్ ఇటీవల ఓర్వకల్ మండలంలో నిర్వహించిన ఒక కార్యక్రమంలో పాల్గొన్నారు. అదే సమయంలో ఎమ్మెల్యే జయసూర్య, గతంలో ఇచ్చిన హామీని గుర్తు చేయడంతో పవన్ సభా వేదికపైనే మాట నిలబెడతానని, తన వ్యక్తిగత నిధుల నుంచి రూ.50 లక్షలు అందిస్తానని (personal contribution) ప్రకటించారు.

మంగళవారం నంద్యాల కలెక్టరేట్‌లో జరిగిన కార్యక్రమంలో ఈ చెక్కును కలెక్టర్ రాజకుమారికి అందజేశారు. అనంతరం ఆమె గ్రామ అభివృద్ధి పనులను నాణ్యతతో నాలుగు నెలల్లోగా పూర్తి చేయాలని అధికారులకు ఆదేశాలు ఇచ్చారు. వాటర్ ట్యాంక్, రోడ్లు, డ్రైనేజీ వ్యవస్థల నిర్మాణానికి నిధులను వినియోగించాలని సూచించారు.

పవన్ కల్యాణ్ మాట నిలబెట్టుకోవడంతో, గ్రామస్తులు ఆయనకు హృదయపూర్వక కృతజ్ఞతలు తెలిపారు. రాజకీయ హామీలను నిజంగా నెరవేర్చే నాయకుడిగా పవన్ కల్యాణ్‌ను గ్రామస్థులు అభినందిస్తున్నారు.

PY Reddy

Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.