జర్నలిస్టులకు మంత్రి పొంగులేటి భరోసా

•  “అక్రిడిటేషన్, మీడియా కార్డులకు తేడా లేదు.. మీతో నేనున్నా!”

అక్రిడిటేషన్ కార్డుదారులకు అందే అన్ని ప్రభుత్వ ప్రయోజనాలు మీడియా కార్డుదారులకూ వర్తిస్తాయి. డెస్క్ జర్నలిస్టులు ఆందోళన చెందవద్దు – మంత్రి పొంగులేటి శ్రీనివాసరెడ్డి.

డెస్క్ జర్నలిస్టుల అపోహలకు తెర

తెలంగాణ రాష్ట్రంలో అక్రిడిటేషన్ కార్డులకు మరియు మీడియా కార్డులకు ఎటువంటి వ్యత్యాసం లేదని రాష్ట్ర రెవెన్యూ, హౌసింగ్, సమాచార పౌర సంబంధాల శాఖ మంత్రి పొంగులేటి శ్రీనివాసరెడ్డి స్పష్టం చేశారు. మంగళవారం సచివాలయంలో తనను కలిసిన టీడబ్ల్యుజేఎఫ్ (TWJF) మరియు డెస్క్ జర్నలిస్ట్ ఫెడరేషన్ ఆఫ్ తెలంగాణ ప్రతినిధులతో ఆయన సుదీర్ఘంగా చర్చించారు. జీవో 252లో కేవలం సాంకేతిక మార్పులు మాత్రమే ఉన్నాయని, ప్రభుత్వపరంగా అందే ప్రతి సంక్షేమ పథకం అక్రిడిటేషన్ కార్డుదారులతో సమానంగా మీడియా కార్డు ఉన్న డెస్క్ జర్నలిస్టులకు కూడా అందుతుందని ఆయన హామీ ఇచ్చారు.

“కొందరు కావాలనే అపోహలు సృష్టించే ప్రయత్నం చేస్తున్నారు, వాటిని నమ్మకండి” అని జర్నలిస్టులకు మంత్రి ధైర్యం చెప్పారు. అర్హులైన ప్రతి జర్నలిస్టుకు మేలు చేయాలన్నదే ప్రభుత్వ ఉద్దేశమని, తెలంగాణ రాష్ట్రం ఇస్తున్నన్ని అక్రిడిటేషన్ కార్డులు దేశంలో మరే రాష్ట్రం ఇవ్వడం లేదని ఆయన గుర్తుచేశారు. డెస్క్ జర్నలిస్టులను రెండు విభాగాలుగా చూడాలన్న ఆలోచన ప్రభుత్వానికి లేదని, పక్షపాతం లేకుండా అందరికీ న్యాయం చేస్తామని స్పష్టం చేశారు.

జీవో 252లో మార్పులు: త్వరలోనే అఖిలపక్ష జర్నలిస్ట్ సంఘాల సమావేశం

అసెంబ్లీ సమావేశాలు ముగిసిన వెంటనే రాష్ట్రంలోని అన్ని జర్నలిస్ట్ సంఘాలతో ప్రత్యేక సమావేశం నిర్వహించనున్నట్లు మంత్రి వెల్లడించారు. ఈ సమావేశానికి డెస్క్ జర్నలిస్టులను కూడా ఆహ్వానించి, అందరి సలహాలు, సూచనల మేరకు జీవో 252లో అవసరమైన మార్పులు, చేర్పులు చేస్తామని లిఖితపూర్వక హామీ ఇచ్చారు. జర్నలిస్టుల సంక్షేమం పట్ల ప్రభుత్వం చిత్తశుద్ధితో ఉందని, వారి ప్రయోజనాలకు భంగం కలగకుండా చూస్తానని ఆయన పునరుద్ఘాటించారు.

ఈ కార్యక్రమంలో టీడబ్ల్యుజేఎఫ్ నాయకులు బి. రాజశేఖర్, గండ్ర నవీన్, ఫెడరేషన్ అధ్యక్ష, ప్రధాన కార్యదర్శులు ఉపేందర్, మస్తాన్, నాయకులు నిస్సార్, విజయ, రాజారాం, స్పోర్ట్స్ జర్నలిస్ట్ అసోసియేషన్ నాయకులు కృష్ణ, శ్రీనివాస్ తదితరులు పాల్గొన్నారు. తమ సమస్యలపై సానుకూలంగా స్పందించినందుకు జర్నలిస్ట్ సంఘాల ప్రతినిధులు మంత్రికి కృతజ్ఞతలు తెలిపారు.

#JournalistsSafety #TelanganaMedia #PonguletiSrinivasReddy #DeskJournalists #GO252

Saran Kumar Thalapula