మేధా పాట్కర్‌కు ఊరట: పరువు నష్టం కేసులో ఢిల్లీ కోర్టు కీలక తీర్పు!

ప్రముఖ సామాజిక కార్యకర్త, నర్మదా బచావో ఆందోళన నేత మేధా పాట్కర్‌కు సుదీర్ఘ కాలంగా సాగుతున్న పరువు నష్టం కేసులో ఢిల్లీ కోర్టు శనివారం (జనవరి 24, 2026) ఊరటనిచ్చింది. ఢిల్లీ లెఫ్టినెంట్ గవర్నర్ (L-G) వి.కె. సక్సేనా దాఖలు చేసిన క్రిమినల్ పరువు నష్టం కేసులో సాక్ష్యాధారాలు లేవంటూ ఆమెను కోర్టు నిర్దోషిగా ప్రకటించింది.

2006లో ఒక టీవీ ఛానెల్ చర్చలో మేధా పాట్కర్ తనపై అనుచిత వ్యాఖ్యలు చేశారంటూ సక్సేనా దాఖలు చేసిన పిటిషన్‌ను విచారించిన సాకేత్ కోర్టు మెజిస్ట్రేట్ రాఘవ్ శర్మ, ప్రాసిక్యూషన్ ఆ ఆరోపణలను నిరూపించడంలో విఫలమైందని స్పష్టం చేశారు. దీంతో దాదాపు రెండు దశాబ్దాల పాటు సాగిన ఈ న్యాయపోరాటం ముగిసినట్లయింది.

కేసు పూర్వాపరాలు

2006లో ఒక టీవీ ప్రోగ్రామ్‌లో మేధా పాట్కర్ మాట్లాడుతూ.. సక్సేనా మరియు ఆయన ఎన్జీవో (National Council for Civil Liberties) సర్దార్ సరోవర్ ప్రాజెక్టుకు సంబంధించిన సివిల్ కాంట్రాక్టులు పొందారని ఆరోపించినట్లు సక్సేనా ఫిర్యాదు చేశారు.

అయితే, విచారణలో భాగంగా మేధా పాట్కర్ ఆ వ్యాఖ్యలు చేసినట్లు నిరూపించే అసలు వీడియో ఫుటేజీని గానీ, ఆడియో రికార్డింగ్‌ను గానీ ఫిర్యాదుదారు కోర్టుకు సమర్పించలేకపోయారు. “కేవలం చిన్న టీవీ క్లిప్పింగ్ ఆధారంగా నిర్ణయం తీసుకోలేము. పూర్తిస్థాయి ఇంటర్వ్యూ లేదా ప్రెస్ కాన్ఫరెన్స్ వీడియో లేకుండా ఆరోపణలు నిరూపితం కావు” అని జడ్జి రాఘవ్ శర్మ వ్యాఖ్యానించారు. అలాగే, ఆ వీడియోను రికార్డ్ చేసిన రిపోర్టర్ లేదా ప్రత్యక్ష సాక్షులను కూడా ప్రాసిక్యూషన్ విచారించలేదని కోర్టు ఎత్తిచూపింది.

పాత కేసులో శిక్ష.. ఈ కేసులో విముక్తి

నిజానికి, వి.కె. సక్సేనా మేధా పాట్కర్‌పై రెండు వేర్వేరు పరువు నష్టం కేసులు వేశారు. 2001లో ఒక పత్రికా ప్రకటనలో సక్సేనాను ఉద్దేశించి చేసిన వ్యాఖ్యలపై నమోదైన మొదటి కేసులో గత ఏడాది (2025 ఆగస్టు) మేధా పాట్కర్ దోషిగా తేలారు.

ఆ కేసులో సుప్రీంకోర్టు కూడా ఆమె శిక్షను సమర్థించి, 1 లక్ష రూపాయల జరిమానాను రద్దు చేస్తూ ప్రొబేషన్‌పై విడుదల చేసింది. అయితే, తాజాగా 2006 నాటి రెండో కేసులో మాత్రం ఆమె నిర్దోషిగా బయటపడటం విశేషం. ఈ విజయం తనపై జరిగిన కుట్రలకు వ్యతిరేకంగా దక్కిన గౌరవంగా మేధా పాట్కర్ తరపు న్యాయవాదులు అభివర్ణించారు.