అస్వస్థతలో ఐపీఎస్ పీఎస్సార్ ఆంజనేయులు- ఆసుపత్రికి తరలింపు

విశ్రాంతి కన్నా విచారణ ఎక్కువగా కనిపిస్తున్న ఈ రోజులలో… అరెస్ట్, రిమాండ్, విచారణ మధ్య లోపలే కాక బయటకూ రావాల్సిన పరిస్థితి శరీరానికే భారం అవుతోంది. అధికార దుర్వినియోగం ఆరోపణలతో అరెస్ట్ అయిన సీనియర్ ఐపీఎస్ అధికారి పీఎస్సార్ ఆంజనేయులు, నకిలీ హౌసింగ్ పట్టాల కేసులో రిమాండ్ ఖైదీగా ఉన్న మాజీ ఎమ్మెల్యే వల్లభనేని వంశీ ఇద్దరూ ప్రస్తుతం అనారోగ్య సమస్యలతో ఆస్పత్రి బెడుపై చికిత్స పొందుతున్నారు. అధికార విచారణల వేళ శారీరక భద్రత ప్రశ్నార్థకంగా మారుతున్న వేళ ఈ ఇద్దరి ఆరోగ్య పరిస్థితి చర్చనీయాంశమైంది.

పీఎస్సార్ ఆరోగ్యం క్షీణత
ఏపీపీఎస్సీలో అవకతవకల కేసులో రిమాండ్ ఖైదీగా ఉన్న ఐపీఎస్ అధికారి పీఎస్సార్ ఆంజనేయులు మరోసారి శనివారం అస్వస్థతకు గురయ్యారు. బీపీలో హెచ్చుతగ్గుల కారణంగా విజయవాడ సెంట్రల్ జైలు నుంచి ప్రభుత్వాస్పత్రికి తరలించారు. ఆయనపై ఇప్పటికే ముంబయి నటి కాదంబరి జత్వానీ అక్రమ నిర్బంధానికి సంబంధించి కేసు నమోదైంది. అనంతరం ఏపీపీఎస్సీ ప్రశ్నపత్రాల మూల్యాంకనంలో ప్రైవేట్ వ్యక్తుల ప్రమేయంపై ఆరోపణలతో మరో కేసు కూడా నమోదైంది.

ఈ వ్యవహారంలో ధాత్రి మధుతో కలిసి పీఎస్సార్‌ను పోలీసులు అరెస్ట్ చేశారు. విచారణ అనంతరం జత్వానీ కేసులో బెయిల్ మంజూరైనప్పటికీ, ఏపిపీఎస్సీ కేసులో మాత్రం ఆయన రిమాండ్‌లోనే కొనసాగుతున్నారు. వయసు కారణంగా ఆరోగ్య సమస్యలు తీవ్రతరమవుతున్న నేపథ్యంలో ఆయనను వైద్య పరీక్షల నిమిత్తం గత వారం ఆస్పత్రికి తరలించారు. తాజాగా శనివారం పరిస్థితి మళ్లీ విషమించడంతో మరోసారి వైద్యం కోసం ఆస్పత్రికి తీసుకెళ్లారు.

వంశీకి కూడా చికిత్స అవసరం
ఇక నకిలీ ఇళ్ల పట్టాల కేసులో రిమాండ్ ఖైదీగా ఉన్న మాజీ ఎమ్మెల్యే వల్లభనేని వంశీ కూడా ఆరోగ్య సమస్యలతో ఇబ్బంది పడుతున్నారు. ఆయన వినతిపై స్పందించిన కోర్టు, వైద్య చికిత్సకు అనుమతి మంజూరు చేసింది. ఫలితంగా శుక్రవారం రాత్రి పోలీసులు వంశీని విజయవాడలోని ప్రైవేటు ఆస్పత్రికి తరలించారు. ఆయనకు రెండు మూడు రోజుల పాటు వైద్యం అందించిన తర్వాత తిరిగి జిల్లా జైలుకు తరలించే అవకాశం ఉంది.

PY Reddy

Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.