“మంత్రులపై అవాకులు చవాకులు పేలితే ఊరుకోం!”: మీడియాకు రేవంత్ వార్నింగ్:

తెలంగాణ మంత్రులు మరియు ప్రజాప్రతినిధులపై కొన్ని మీడియా సంస్థలు కావాలనే తప్పుడు ప్రచారం చేస్తున్నాయని ముఖ్యమంత్రి రేవంత్ రెడ్డి తీవ్ర ఆగ్రహం వ్యక్తం చేశారు. సింగరేణిలో బొగ్గు మాయమైందంటూ వస్తున్న వార్తలను ఆయన ఖండిస్తూ, కాంగ్రెస్ ప్రభుత్వంలో అవకతవకలకు తావులేదని స్పష్టం చేశారు. మంత్రులు, ఎమ్మెల్యేలపై వార్తలు రాసే ముందు కనీస వివరణ తీసుకోవాలని, వ్యక్తిగత పంతాలతో ప్రభుత్వాన్ని బద్నాం చేయాలని చూస్తే సహించేది లేదని ఆయన ఘాటుగా హెచ్చరించారు.

సింగరేణి వార్తలపై క్లారిటీ.. అవినీతికి తావులేదు

సింగరేణిలో బొగ్గు మాయమైందంటూ కొన్ని పత్రికల్లో వచ్చిన కథనాలపై ముఖ్యమంత్రి మండిపడ్డారు. “మా పాలనలో బొగ్గు మాయం కావడం లాంటి పాత పద్ధతులు ఉండవు, ప్రతి అంశం పారదర్శకంగా జరుగుతోంది” అని ఆయన పేర్కొన్నారు. మీడియా సంస్థలకు ఎవరితోనైనా వ్యక్తిగత పంచాయితీలు ఉంటే అవి స్వయంగా తేల్చుకోవాలని, కానీ వాటిని ప్రభుత్వానికి ముడిపెట్టి మంత్రుల ప్రతిష్టను దిగజార్చవద్దని హితవు పలికారు. “మైదానంలో క్రీడాకారుల మధ్య పోటీ ఉండాలి కానీ, ఒకరిపై ఒకరు బురదజల్లుకోవడం సరైంది కాదు” అని మీడియా తీరును ఎండగట్టారు.

వార్త రాసే ముందు నన్ను అడగండి: సీఎం రేవంత్

ప్రజాప్రతినిధులపై వార్తలు ప్రచురించే విషయంలో మీడియా కనీస నైతికత పాటించాలని ముఖ్యమంత్రి సూచించారు. మంత్రులు, ఎమ్మెల్యేలు లేదా ఎమ్మెల్సీలపై ఏదైనా వ్యతిరేక వార్త రాసే ముందు నేరుగా తననే వివరణ అడగాలని ఆయన పేర్కొన్నారు. ఆధారాలు లేకుండా తప్పుడు ప్రచారం చేసి ప్రభుత్వాన్ని ఇరకాటంలో పెట్టాలని చూస్తే చట్టపరమైన చర్యలు తప్పవని సంకేతాలు ఇచ్చారు. వాస్తవాలను వెలికితీయడం మీడియా బాధ్యత అని, కానీ కల్పిత గాథలతో ప్రజలను తప్పుదోవ పట్టించవద్దని ఆయన విజ్ఞప్తి చేశారు.

PY Reddy

Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.