చిత్తూరులో టైక్వాండో సమరం.. కలెక్టర్ ప్రారంభం!
వందలాది మంది క్రీడాకారుల మధ్య అట్టహాసంగా ప్రారంభమైన 5వ అంతరాష్ట్ర టైక్వాండో ఛాంపియన్షిప్–2026.
మార్షల్ ఆర్ట్స్ జాతర.. 10 రాష్ట్రాల ప్రాతినిధ్యం
ఆంధ్రప్రదేశ్ అమెచ్యూర్ టైక్వాండో అసోసియేషన్ ఆధ్వర్యంలో చిత్తూరులోని మెసానికల్ గ్రౌండ్ అంబేడ్కర్ భవన్ ఇండోర్ స్టేడియం వేదికగా 5వ అంతరాష్ట్ర టైక్వాండో ఛాంపియన్షిప్ శనివారం ఘనంగా ప్రారంభమైంది. గ్రాండ్ మాస్టర్ బాబురావు నేతృత్వంలో నిర్వహిస్తున్న ఈ మెగా టోర్నీని జిల్లా కలెక్టర్ సుమిత్ కుమార్ జ్యోతి ప్రజ్వలన చేసి ప్రారంభించారు. ఈ సందర్భంగా ఆయన మాట్లాడుతూ, క్రీడలు శారీరక ధృడత్వంతో పాటు క్రమశిక్షణను పెంపొందిస్తాయని కొనియాడారు.
జనవరి 10 మరియు 11 తేదీలలో రెండు రోజుల పాటు జరిగే ఈ పోటీల్లో ఆంధ్రప్రదేశ్, తెలంగాణతో పాటు దేశవ్యాప్తంగా సుమారు 10 రాష్ట్రాల నుండి 300 మందికి పైగా క్రీడాకారులు తరలివచ్చారు. క్రీడాకారుల బరువు ఆధారంగా సబ్ జూనియర్, క్యాడెట్, జూనియర్, సీనియర్ కేటగిరీలలో బాలబాలికలకు వేర్వేరుగా పోటీలు నిర్వహిస్తున్నారు. స్టేడియం అంతా క్రీడాకారుల కేకలు, పంచ్లతో మార్షల్ ఆర్ట్స్ సందడి నెలకొంది.
ప్రముఖుల సమక్షం.. ఉత్సాహంగా పోరు
ఈ ప్రారంభోత్సవ కార్యక్రమంలో రిటైర్డ్ డి.ఎస్.ఓ బాలాజీ, గుడ్ షేఫర్డ్ స్కూల్ ప్రిన్సిపల్ చంద్రకళతో పాటు అసోసియేషన్ ప్రతినిధులు పెద్ద సంఖ్యలో పాల్గొన్నారు. అసోసియేషన్ ఉపాధ్యక్షులు ఆనంద్ (వైజాగ్), కోశాధికారి నాగేశ్వర రావు (చిత్తూరు), జాయింట్ సెక్రటరీలు వెంకటేష్ (కర్నూలు), బాలకృష్ణ (తిరుపతి), ఆర్.కే. ప్రసాద్ తదితరులు క్రీడాకారులను ఉత్సాహపరిచారు. విజేతలకు పతకాలతో పాటు సర్టిఫికేట్లు అందజేయనున్నట్లు నిర్వాహకులు తెలిపారు.
రెండు రోజుల పాటు జరిగే ఈ పోరులో అత్యుత్తమ ప్రదర్శన కనబరిచిన క్రీడాకారులను జాతీయ స్థాయి పోటీలకు ఎంపిక చేసే అవకాశం ఉంది. మొదటి రోజే క్రీడాకారులు అద్భుతమైన కిక్స్ మరియు డిఫెన్సివ్ టెక్నిక్స్తో ప్రేక్షకులను ఆకట్టుకున్నారు. మారుమూల ప్రాంతాల నుంచి వచ్చిన క్రీడాకారులకు కూడా అన్ని రకాల వసతులు కల్పించినట్లు గ్రాండ్ మాస్టర్ బాబురావు ఈ సందర్భంగా పేర్కొన్నారు.
#Taekwondo2026 #ChittoorSports #MartialArtsIndia #SportsJournalism #TaekwondoChampionship
Gayathri M, Vijayawada 
Bhaskar, Ongole 