పిపిపి అంటే తెలియదు… ఈయనో ‘పెద్దవీరుడు’.. : సీఎం చంద్రబాబు ఫైర్!

తూర్పుగోదావరి జిల్లా రాయవరం బహిరంగ సభలో ముఖ్యమంత్రి నారా చంద్రబాబు నాయుడు వైకాపా అధినేత జగన్ మోహన్ రెడ్డిపై తీవ్రస్థాయిలో విరుచుకుపడ్డారు. పబ్లిక్ ప్రైవేట్ పార్టనర్‌షిప్ (PPP) విధానంపై జగన్‌కు కనీస అవగాహన లేదని, మెడికల్ కళాశాలల నిర్మాణాన్ని అడ్డుకుంటూ అభివృద్ధిని కాంక్షించే వారిని బెదిరిస్తున్నారని మండిపడ్డారు. పీపీపీ విధానంలో నిర్మించిన భోగాపురం విమానాశ్రయం ముద్దు కానీ, అదే విధానంలో పేదలకు వైద్యం అందించే కళాశాలలు వద్దనడం జగన్ ద్వంద్వ నీతికి నిదర్శనమని ఎద్దేవా చేశారు. రాష్ట్రంలో శాంతిభద్రతలను కాపాడటం తమ ప్రాధాన్యతని, కానీ ‘పెద్దవీరుడు’ పేరిట తిరుగుతున్న జగన్ కేవలం విద్వేషాలు రగిల్చేందుకే ప్రయత్నిస్తున్నారని ధ్వజమెత్తారు.

తిరుమల అపవిత్రం వెనుక సాక్షి కుట్ర: బాంబు పేల్చిన చంద్రబాబు

తిరుమల పవిత్రతను దెబ్బతీసేందుకు వైకాపా సానుభూతిపరులు అత్యంత నీచమైన కుట్రలకు పాల్పడుతున్నారని చంద్రబాబు ఆరోపించారు. కూటమి ప్రభుత్వం తిరుమలను పవిత్రంగా నిర్వహిస్తుంటే ఓర్వలేక, ఖాళీ మద్యం సీసాలను కొండపైకి తీసుకెళ్లి ప్లాంట్ చేశారని, ఆ తర్వాత సాక్షి టీవీ మరియు పత్రికల్లో తప్పుడు ప్రచారం చేశారని ఆగ్రహం వ్యక్తం చేశారు. అయితే, ఆ సీసాలపై ఉన్న హాలోగ్రామ్ ఆధారంగా దర్యాప్తు చేయగా, ఈ కుట్ర వెనుక ఉన్న దొంగలు దొరికిపోయారని వెల్లడించారు. గత ప్రభుత్వ హయాంలో నెయ్యి కల్తీ మరియు దర్శనాల అక్రమాలతో తిరుమలను అపవిత్రం చేశారని, ఇప్పుడు పవిత్రతను కాపాడే ప్రయత్నం చేస్తుంటే అడ్డుకుంటున్నారని మండిపడ్డారు.

డాక్టర్ సుధాకర్ ఉదంతాన్ని గుర్తు చేస్తూ, గత ప్రభుత్వం ఒక దళిత డాక్టరును చిత్రహింసలు పెట్టి, పిచ్చోడని ముద్రవేసి మానసికంగా చంపేసిందని చంద్రబాబు ఆవేదన వ్యక్తం చేశారు. తమ ప్రభుత్వం అధికారంలోకి వచ్చాక డాక్టర్ సుధాకర్ కుమారుడికి పదోన్నతి కల్పించి, ఆ కుటుంబానికి రూ. కోటి ఆర్థిక సాయం అందజేసి ఆదుకున్నామని చెప్పారు. వెనుజులా వంటి దేశాల్లో నియంతృత్వ పోకడల వల్ల ప్రజలు ఎలా ఇబ్బంది పడ్డారో, గత ఐదేళ్ల జగన్ పాలనలో ఏపీలో అదే పరిస్థితి ఉండేదని, ఇప్పుడు తెలుగు జాతి ప్రయోజనాల కోసం తాము అహర్నిశలు శ్రమిస్తున్నామని స్పష్టం చేశారు.

నదుల అనుసంధానంతోనే ఏపీ అభివృద్ధి: తెలంగాణకూ ఆహ్వానం

నీళ్లు కావాలా.. గొడవలు కావాలా? అంటే జగన్ గొడవలే కావాలనుకుంటారని, కానీ తనకు మాత్రం రాష్ట్ర అభివృద్ధి ముఖ్యమని చంద్రబాబు పేర్కొన్నారు. నదులను అనుసంధానం చేయడం ద్వారా రాష్ట్రాన్ని సస్యశ్యామలం చేస్తామని, దీనివల్ల ఏపీ దేశంలోనే అగ్రగామిగా మారుతుందని ధీమా వ్యక్తం చేశారు. ఈ జలవనరుల వినియోగంలో అవసరమైతే పొరుగు రాష్ట్రమైన తెలంగాణ కూడా భాగస్వామ్యం కావచ్చని, తెలుగు జాతి మధ్య విద్వేషాలు పెంచడం తమ విధానం కాదని ప్రకటించారు. విభజన సమస్యలను పక్కన పెట్టి ఉభయ రాష్ట్రాల అభివృద్ధికి సహకరించుకోవాలని పిలుపునిచ్చారు.

Appala Naidu, Reporter Vizag