హైదరాబాద్, మే 31, 2025: బీఆర్ఎస్ పార్టీ బీజేపీలో విలీనం కాబోతోందంటూ కొందరు వ్యక్తులు, కొన్ని రాజకీయ పార్టీలు చేస్తున్న దుష్ప్రచారాన్ని తాము తీవ్రంగా ఖండిస్తున్నామని శాసన మండలి ప్రతిపక్ష నేత మధుసూదనాచారి స్పష్టం చేశారు. తెలంగాణ ప్రయోజనాలను కాపాడటంలో కాంగ్రెస్, బీజేపీలు విఫలమయ్యాయని ఆయన అన్నారు. జూన్ 2వ తేదీన తెలంగాణ భవన్‌లో బీఆర్ఎస్ ఆవిర్భావ వేడుకలు ఘనంగా జరుగుతాయని తెలిపారు.
టీఆర్ఎస్ ఆవిర్భావం – కేసీఆర్ పోరాటం:
ఉమ్మడి ఆంధ్రప్రదేశ్‌లో కాంగ్రెస్ పార్టీకి వ్యతిరేకంగా టీడీపీ ఆవిర్భవించినట్లే, తెలంగాణలో ప్రతికూల పరిస్థితుల్లో కేసీఆర్ టీఆర్ఎస్‌ను స్థాపించారని మధుసూదనాచారి గుర్తు చేశారు. “తెలంగాణ అంటే నక్సలైట్లు” అన్న సందర్భంలో కేసీఆర్ పార్టీని ఏర్పాటు చేసి, కాంగ్రెస్, టీడీపీలకు ధీటుగా ఎదిగారు. చంద్రబాబు, వైఎస్‌ఆర్ వంటి బలమైన నాయకులను కేసీఆర్ ఎదుర్కొని, తెలంగాణను సాధించి ముఖ్యమంత్రి అయ్యారని, రాష్ట్రాన్ని అభివృద్ధి చేశారని ఆయన కొనియాడారు.
కుట్రలను తిప్పికొట్టాలి:
బీఆర్ఎస్ పార్టీని బలహీనపరిచేందుకు కుట్రపూరితంగా ప్రచారం చేస్తున్నారని మధుసూదనాచారి ఆరోపించారు. కేసీఆర్ ముఖ్యమంత్రిగా లేనందుకు ప్రజలు బాధపడుతున్నారని, కేసీఆర్ పాలనపై చర్చ వస్తే కాంగ్రెస్, బీజేపీల రాజకీయ పునాదులు కదులుతాయని ఆయన అన్నారు. పరిపాలనలో కాంగ్రెస్, బీజేపీ ప్రజల మెప్పు పొందాలని, కేంద్రమంత్రుల భాష, వారి పాలన ప్రజలు అసహ్యించుకునే విధంగా ఉన్నాయని విమర్శించారు. కేసీఆర్ నాయకత్వం పట్ల ప్రజలు సానుకూలంగా ఉన్నారని, తెలంగాణ ప్రజలు ఉన్నంతవరకు బీఆర్ఎస్ ఉంటుందని ఆయన ధీమా వ్యక్తం చేశారు.
కేసీఆర్ నిర్ణయమే అంతిమం:
పార్టీలో ఏ నిర్ణయం అయినా కేసీఆర్ మాత్రమే తీసుకుంటారని మధుసూదనాచారి స్పష్టం చేశారు. కేసీఆర్ ఆలోచనలు తనకు తెలుసని, తెలంగాణ ప్రయోజనాలకు ఎట్టి పరిస్థితుల్లో భంగం కలగదని ఆయన హామీ ఇచ్చారు. జూన్ 2వ తేదీన కాళేశ్వరం ప్రాజెక్టుపై మాజీ మంత్రి, ఎమ్మెల్యే హరీష్ రావు పవర్ పాయింట్ ప్రజెంటేషన్ ఇస్తారని ఆయన ప్రకటించారు.
