విజయవాడలో”బంగారం బిస్కెట్” మోసం

విజయవాడ, మే 29:విజయవాడ నగరం ఆశల బంగారంగా మిన్నకున్న రోజు. బంగారం ధరలు ఆకాశాన్ని తాకుతున్న వేళ, తక్కువ ధరకు బంగారం వస్తుందంటే ఎవ్వరూ వద్దంటారా! “బంగారం బిస్కెట్ స్కీమ్” అంటూ ఓ వ్యాపారి సృష్టించిన మాయాజాలం చివరికి వందలమంది ఆశల్ని బూడిదచేసింది. బంగారం కాదు.. చివరకు క్రీం బిస్కెట్‌ కూడా ఇవ్వలేదని బాధితులు ఆవేదన వ్యక్తం చేస్తున్నారు. ఈ మోసపు బంగారం పాటకు దాదాపు 10 కోట్ల రూపాయల మధుర స్వరం వినిపించినా చివరకు నిరాశే గతి అయింది.

ఏమిటీ బంగారం బిస్కెట్ స్కీమ్?
విజయవాడకు చెందిన ముచ్చర్ల శ్రీనివాస్ అనే వ్యాపారి, గతంలో పచ్చళ్ళ వ్యాపారం చేసి స్థానికుల విశ్వాసాన్ని సంపాదించాడు. అదే నమ్మకాన్ని క్యాష్ చేసుకునేందుకు కొత్త ప్లాన్ వేయించాడు. “చీటీ పాటలు” పేరిట బంగారం బిస్కెట్లు పథకాన్ని ప్రారంభించాడు. నెలనెలా పాట వేసే వారికి బంగారం అందిస్తానన్న మాటతో స్కీమ్ ఎంతో మందిని ఆకర్షించింది.

ఒక్కో సభ్యుడు నెలకు 5 గ్రాముల బంగారం ధర కట్టాలి. మొత్తం 25 మంది సభ్యులు కలసి పాట వేస్తే, ఒక్కసారిగా 125 గ్రాముల బంగారం కొనుపెట్టి పాట పాడినవారికి అందిస్తారన్నమాట. తర్వాత నెల నుంచి 5 గ్రాములతో పాటు అదనంగా 3 గ్రాములు చెల్లించాలి. తద్వారా తరువాతి పాట వేసే వారికి ఎక్కువ బంగారం లభించేది. ఇదే అదృష్టం అనుకుని చాలామంది బంగారం చెల్లించేవారు. కానీ పాటల సంఖ్య తగ్గడంతో చివరికి అన్ని బంగారం శ్రీనివాస్‌ వద్దే నిలిచిపోయింది.

మోసానికి తెరలేపిన లక్ష్మణుడి ఫిర్యాదు
చలువాది లక్ష్మణుడు అనే వ్యక్తి తనకు రూ.1 కోటి విలువైన బంగారం ఇవ్వాలని అజిత్‌సింగ్‌నగర్‌ పోలీస్‌స్టేషన్‌లో ఫిర్యాదు చేయడంతో మోసానికి తెరతీశాడు. బాధితుల సంఖ్య క్రమంగా బయటపడింది. బుధవారం నాడు దాదాపు 65 మంది బాధితులు పోలీస్‌స్టేషన్‌ను చుట్టుముట్టారు. అయితే చాలా మంది ఫిర్యాదు నమోదు చేయకుండా వెనక్కు తగ్గారు.

పోలీసుల ఆరా… నిందితుడి కోసం గాలింపు
అజిత్‌సింగ్‌నగర్‌ సీఐ వెంకటేశ్వర్లు నాయక్‌ బృందం నిందితుడు శ్రీనివాస్ కోసం గాలింపు చర్యలు ప్రారంభించింది. అతడు పట్టుబడితేనే ఎక్కడెక్కడి నుంచి ఎంత మోసం చేశాడో, ఎంత బంగారం, ఎంత నగదు తీసుకున్నాడో వివరాలు వెలుగులోకి రానున్నాయి.

సామాజిక నమ్మకాన్ని చీల్చిన బంగారం స్కీమ్
ఈ ఘటనతో మరోసారి “విశ్వాసం అనేది వెచ్చించిన తర్వాత వెనక్కు తీసుకోలేని ధనంలా” అనిపిస్తోంది. బంగారం మీద ఉన్న బలమైన ఆకర్షణను తన వ్యాపార నైపుణ్యంతో మలిచిన శ్రీనివాస్, చివరికి సమాజంపై మచ్చ వేసిన మోసగాడిగా మిగిలిపోయాడు.

PY Reddy

Doctorate in Journalism with 29 years of hands-on experience in print, electronic, and digital media, alongside sustained academic engagement as a postgraduate instructor in journalism and communication studies.