హోటళ్లపై ఎల్‌పీజీ కొరత ఎఫెక్ట్.. కట్టెల పొయ్యిలే దిక్కా?

దేశవ్యాప్తంగా చమురు, గ్యాస్ నిల్వలు పుష్కలంగా ఉన్నాయని కేంద్ర ప్రభుత్వం చెబుతున్నప్పటికీ, క్షేత్రస్థాయిలో పరిస్థితి భిన్నంగా కనిపిస్తోంది. పలు ప్రధాన నగరాల్లో కమర్షియల్ ఎల్‌పీజీ సిలిండర్ల కొరత తీవ్రం కావడంతో హోటళ్లు, రెస్టారెంట్లు మూతపడే స్థితికి చేరుకున్నాయి. ఐటీ హబ్ బెంగళూరు నుంచి ఆర్థిక రాజధాని ముంబై వరకు వ్యాపారులు సిలిండర్ల కోసం అల్లాడిపోతున్నారు. సరఫరా వ్యవస్థలో తలెత్తిన లోపాల కారణంగా నిత్యం వేలాది సిలిండర్లు అవసరమయ్యే చోట నిల్వలు నిండుకోవడంతో ప్రత్యామ్నాయ మార్గాల కోసం యజమానులు వెతుకులాడుతున్నారు. ఈ ప్రభావం ఇప్పుడు భాగ్యనగరాన్ని కూడా తాకడం ఆందోళన కలిగిస్తోంది.

బెంగళూరులో కట్టెల పొయ్యిపై వంట.. ముంబైలో రెస్టారెంట్లు బంద్!

సిలిండర్ల కొరత ప్రభావం బెంగళూరులో అత్యధికంగా కనిపిస్తోంది. అక్కడ గ్యాస్ లభ్యత పడిపోవడంతో పేరున్న త్రీస్టార్ హోటళ్లు సైతం వంట కోసం కట్టెల పొయ్యిలను ఆశ్రయించడం గమనార్హం. రోజుకు 10 సిలిండర్లు అవసరమయ్యే చోట ఒక్కటి కూడా దొరకని పరిస్థితి నెలకొంది. అటు ముంబైలో పరిస్థితి మరింత విషమంగా ఉంది. కమర్షియల్ గ్యాస్ అందక ఇప్పటికే దాదాపు 20 శాతం రెస్టారెంట్లు తాత్కాలికంగా బోర్డు తిప్పేశాయి. ఇదే పరిస్థితి కొనసాగితే సగానికి పైగా హోటళ్లు మూతపడే ప్రమాదం ఉందని హోటల్ అసోసియేషన్లు హెచ్చరిస్తున్నాయి.

హైదరాబాద్‌పై గ్యాస్ కొరత నీడలు

ప్రస్తుతం ఈ గ్యాస్ సెగ హైదరాబాద్ నగరానికి కూడా పాకింది. నగరంలోని కొన్ని ప్రాంతాల్లో చిన్న మరియు మధ్య తరహా హోటళ్లు సిలిండర్ల సరఫరా లేక ఇబ్బందులు ఎదుర్కొంటున్నాయి. డిస్ట్రిబ్యూటర్ల వద్ద నిల్వలు పరిమితంగా ఉండటంతో ఆర్డర్ ఇచ్చిన సమయానికి గ్యాస్ అందడం లేదని యజమానులు వాపోతున్నారు. హోటల్ రంగంపై ఆధారపడి వేలమంది కార్మికులు జీవిస్తున్న తరుణంలో, గ్యాస్ కొరత వల్ల వ్యాపారాలు దెబ్బతింటే భారీ నష్టం వాటిల్లే అవకాశం ఉందని నగర హోటల్ నిర్వాహకులు ఆందోళన చెందుతున్నారు.

ప్రభుత్వ వివరణ.. వ్యాపారుల విన్నపం

మరోవైపు కేంద్ర ప్రభుత్వం మాత్రం దేశంలో చమురు నిల్వలకు ఎలాంటి ఢోకా లేదని భరోసా ఇస్తోంది. రవాణాలో తలెత్తిన సాంకేతిక సమస్యల వల్లే కొన్ని చోట్ల ఆలస్యం జరుగుతోందని, ఆయిల్ కంపెనీలు దీనిని పరిష్కరించే పనిలో ఉన్నాయని అధికారులు పేర్కొంటున్నారు. అయితే, పరిస్థితి ముదిరితే హోటల్ రంగం సంక్షోభంలో పడే అవకాశం ఉందని, ప్రభుత్వం తక్షణమే జోక్యం చేసుకుని గ్యాస్ సరఫరాను పునరుద్ధరించాలని వ్యాపార వర్గాలు కోరుతున్నాయి.
#GasShortage #LPGShortage #HyderabadHotels #BusinessCrisis #LPGPriceHike #CommercialCylinders #FoodIndustry #IndiaNews

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.