అర్హులకే పథకాలు అందాలి – అక్రమాలకు తావుండొద్దు

• కలెక్టర్ల సదస్సులో సీఎం రేవంత్ రెడ్డి దిశానిర్దేశం

తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టిన ‘ప్రజాపాలన-ప్రగతి ప్రణాళిక’పై ముఖ్యమంత్రి ఎనుమల రేవంత్ రెడ్డి జిల్లా కలెక్టర్లతో సుదీర్ఘంగా సమావేశమయ్యారు. మంగళవారం సచివాలయంలో జరిగిన ఈ కలెక్టర్ల సదస్సులో ముఖ్యమంత్రి పలు కీలక ఆదేశాలు జారీ చేశారు. ప్రభుత్వ పథకాల అమలులో పారదర్శకత పెంచేందుకు లబ్ధిదారుల ముఖ గుర్తింపు (Facial Recognition) విధానాన్ని తప్పనిసరి చేయాలని ఆదేశించారు. ఆసరా పింఛన్లలో ఈ విధానం వల్ల ఇప్పటికే మూడు లక్షల మంది అనర్హులను గుర్తించగలిగామని సీఎం ఈ సందర్భంగా గుర్తు చేశారు.

99 రోజుల కార్యాచరణ – యాక్షన్ ప్లాన్

రాష్ట్ర ఆవిర్భావ వేడుకల వరకు (జూన్ 2) ప్రభుత్వం ఒక స్పష్టమైన రోడ్ మ్యాప్‌ను సిద్ధం చేసింది. దీని ప్రకారం:

• ఏప్రిల్ 2: గ్రామ సభల నిర్వహణ.

• ఏప్రిల్ 16: మండల స్థాయి కార్యక్రమాలు.

• మే 2: నియోజకవర్గ స్థాయి సభలు.

• మే 22: జిల్లా స్థాయి సమీక్షలు.

• జూన్ 2: రాష్ట్ర ఆవిర్భావ దినోత్సవ వేడుకలు.

విద్య, వైద్యంపై ప్రత్యేక నిఘా

ప్రభుత్వ ఆసుపత్రులను మెడికల్ కాలేజీలతో అనుసంధానం చేయాలని సీఎం సూచించారు. విద్యా సంస్థల్లో డ్రగ్స్, గంజాయి వినియోగం జరిగితే ఆయా యాజమాన్యాలదే బాధ్యతని హెచ్చరించారు. ప్రతి పాఠశాలలో సైకాలజిస్ట్ ఉండాలని ఆదేశించారు. ముఖ్యంగా మధ్యాహ్న భోజనం నాణ్యతపై కలెక్టర్లు స్వయంగా పర్యవేక్షణ చేయాలని, వారానికి ఒకసారి వారే స్వయంగా విద్యార్థులతో కలిసి భోజనం చేయాలని స్పష్టం చేశారు.

రైతు సంక్షేమం – వ్యవసాయ మార్పులు

యూరియా యాప్‌ను రైతులకు సులభతరం చేయాలని, నానో యూరియా వినియోగంపై అవగాహన కల్పించాలని సీఎం కోరారు. భూసార పరీక్షల ఆధారంగా మార్కెట్‌లో డిమాండ్ ఉన్న పంటలను సాగు చేసేలా రైతులను ప్రోత్సహించాలన్నారు. ధాన్యం సేకరణలో మిల్లర్ల మోసాల పట్ల కఠినంగా ఉండాలని, ఇసుక మాఫియా, అక్రమ మైనింగ్‌పై నిర్లక్ష్యం వహిస్తే కలెక్టర్లు, ఎస్పీలను అక్కడికక్కడే సస్పెండ్ చేస్తామని తీవ్రంగా హెచ్చరించారు.

కలెక్టర్ల పనితీరుపై ఆగ్రహం

కొందరు కలెక్టర్లు జిల్లా హెడ్ క్వార్టర్స్‌లో ఉండకుండా హైదరాబాద్‌కు వస్తున్నారన్న సమాచారంపై సీఎం ఆగ్రహం వ్యక్తం చేశారు. “ఆషామాషీగా కలెక్టర్లు కాలేరు, కనీసం నెలలో 10 రోజులైనా క్షేత్రస్థాయిలో పర్యటించాలి” అని హితవు పలికారు. ప్రజలకు ఉపయోగపడే పనులు చేసినప్పుడే ఉద్యోగానికి సార్థకత ఉంటుందని గుర్తు చేశారు. జూన్ నెలలో మళ్లీ కలెక్టర్ల పనితీరును సమీక్షిస్తామని వెల్లడించారు.

#TelanganaNews #RevanthReddy #CollectorsMeeting #PrajaPalana #TelanganaGovt #WelfareSchemes #FacialRecognition #GoodGovernance

Saran Kumar Thalapula