తుపాకీ నీడలో బ్యాలెట్ యుద్ధం!
బంగ్లాదేశ్ రాజకీయ చరిత్రలో అత్యంత కీలకమైన ఘట్టానికి రంగం సిద్ధమైంది. మాజీ ప్రధాని షేక్ హసీనా నిష్క్రమణ తర్వాత ఏర్పడిన తాత్కాలిక ప్రభుత్వం ఆధ్వర్యంలో రేపు సార్వత్రిక ఎన్నికలు జరగనున్నాయి. గత ఏడాది చోటుచేసుకున్న హింసాత్మక ఘటనల నేపథ్యంలో, ఈ ఎన్నికలను అత్యంత ప్రతిష్టాత్మకంగా తీసుకున్న అధికారులు కట్టుదిట్టమైన భద్రతను ఏర్పాటు చేశారు. సుమారు ఏడాదిన్నర నిరీక్షణ తర్వాత దేశ భవిష్యత్తును నిర్ణయించేందుకు ప్రజలు ఓటు హక్కు వినియోగించుకోనున్నారు.
రక్తపాతం నుంచి ప్రజాస్వామ్యం వైపు..
గత ఆగస్టులో రిజర్వేషన్ల వ్యతిరేక ఉద్యమం బంగ్లాదేశ్ను కుదిపేసింది. ఈ పోరాటంలో దాదాపు 1500 మంది ప్రాణాలు కోల్పోగా, అప్పటి ప్రధాని షేక్ హసీనా దేశం విడిచి వెళ్లాల్సి వచ్చింది. ఆ తర్వాత మహమ్మద్ యూనస్ నేతృత్వంలోని తాత్కాలిక ప్రభుత్వం పగ్గాలు చేపట్టింది. ఈ సుదీర్ఘ అస్థిరతకు తెరదించుతూ ప్రజాస్వామ్యబద్ధంగా ప్రభుత్వాన్ని ఎన్నుకునేందుకు రేపు పోలింగ్ జరగనుంది.
అప్రమత్తమైన యంత్రాంగం: 90 శాతం బూత్లలో నిఘా
ఎన్నికల సమయంలో ఘర్షణలు తలెత్తే అవకాశం ఉందన్న ఇంటెలిజెన్స్ వర్గాల హెచ్చరికలతో ఎన్నికల సంఘం అప్రమత్తమైంది. సుమారు 50 శాతం పోలింగ్ కేంద్రాల వద్ద ఉద్రిక్తతలు చోటుచేసుకునే ఛాన్స్ ఉందని అంచనా వేస్తున్నారు. ఈ క్రమంలో దాదాపు 90 శాతం బూత్లను సీసీటీవీ కెమెరాల నిఘాలో ఉంచారు. రాజధాని ఢాకాలో పోలీసులు బాడీ కెమెరాలను ధరించి విధులు నిర్వహించనుండటం విశేషం.
లక్షలాది మంది పోలీసులతో భారీ మోహరింపు
శాంతిభద్రతల పరిరక్షణ కోసం దేశవ్యాప్తంగా సుమారు 9,58,000 మంది పోలీసులను రంగంలోకి దించినట్లు ఎన్నికల కమిషనర్ అబ్దుల్ ఫజల్ మొహమ్మద్ సనావుల్లా వెల్లడించారు. ముఖ్యంగా ఢాకాలోని 2,131 పోలింగ్ కేంద్రాల్లో 1,614 కేంద్రాలను ‘హై రిస్క్’ జోన్లుగా గుర్తించారు. సాంకేతిక పరిజ్ఞానాన్ని విస్తృతంగా వాడుతూ, నిష్పాక్షికంగా ఎన్నికలు నిర్వహించేందుకు అధికారులు అన్ని చర్యలు తీసుకుంటున్నారు.
#BangladeshElections #Dhaka #SecurityAlert #Democracy #GlobalNews #BangladeshNews #ElectionUpdate
PY Reddy 