Lakshmi MS, Tirupati 
చిత్తూరు జిల్లాలో భారీ అగ్నిప్రమాదం.. కోళ్ల పరిశ్రమ దగ్ధం!
ఏర్పేడు మండలంలోని గాజుల పెళ్లూరులో కోళ్ల పరిశ్రమలో భారీ అగ్నిప్రమాదం సంభవించింది. విద్యుత్ షార్ట్ సర్క్యూట్ కారణంగా ఒక్కసారిగా మంటలు చెలరేగడంతో భారీగా ఆస్తి నష్టం వాటిల్లింది. కొత్త బ్యాచ్ కోడి పిల్లలను దించేందుకు సిద్ధం చేసిన సమయంలోనే ఈ ప్రమాదం జరగడంతో యజమాని తీవ్ర ఆవేదన వ్యక్తం చేస్తున్నారు. సమాచారం అందుకున్న అగ్నిమాపక సిబ్బంది సంఘటనా స్థలానికి చేరుకుని మంటలను అదుపు చేశారు.
విద్యుత్ షార్ట్ సర్క్యూట్తో చెలరేగిన మంటలు
గాజుల పెళ్లూరు గ్రామ రెవెన్యూ పరిధిలోని సర్వే నెంబర్ 6లో వెంకట రమణారెడ్డికి చెందిన డివై కోళ్ల పరిశ్రమ ఉంది. సుమారు 13 నెలల క్రితమే అత్యాధునిక సౌకర్యాలతో ఈ షెడ్ను నిర్మించారు. సోమవారం సడన్గా విద్యుత్ షార్ట్ సర్క్యూట్ ఏర్పడటంతో మంటలు అంటుకున్నాయి. షెడ్ లోపల ఉన్న పరికరాలు, సామాగ్రికి వేగంగా మంటలు వ్యాపించడంతో ఆ ప్రాంతమంతా నల్లటి పొగలు కమ్ముకున్నాయి.
గంటలోపే సర్వం భస్మం
మంటలు చెలరేగడం గమనించిన సిబ్బంది వెంటనే వాటిని అదుపు చేసేందుకు శతవిధాలా ప్రయత్నించారు. అయితే గాలుల ప్రభావంతో మంటలు కేవలం 25 నిమిషాల్లోనే షెడ్ మొత్తానికి విస్తరించాయి. శ్రీకాళహస్తి, సూళ్లూరుపేట ఫైర్ స్టేషన్లకు సమాచారం ఇవ్వగా, సూళ్లూరుపేట నుంచి వచ్చిన ఫైర్ ఇంజన్ మంటలను అదుపులోకి తెచ్చింది. అగ్నిమాపక సిబ్బంది అప్రమత్తంగా వ్యవహరించడంతో పక్కనే ఉన్న మరో షెడ్కు మంటలు వ్యాపించకుండా నివారించగలిగారు.
రూ. 2.5 కోట్ల భారీ ఆస్తి నష్టం
ఈ ప్రమాదం జరిగిన సమయంలో షెడ్లో కోడి పిల్లలు లేకపోవడంతో ప్రాణనష్టం తప్పింది. ఇప్పటికే 8 బ్యాచ్ల పెంపకం పూర్తి కాగా, మరో రెండు రోజుల్లో 9వ బ్యాచ్ పిల్లలను షెడ్లోకి తీసుకురావాల్సి ఉంది. ఈ క్రమంలో జరిగిన ప్రమాదంలో ప్రధాన షెడ్ పూర్తిగా కాలిపోయింది. సుమారు రూ. 2 కోట్ల 50 లక్షల మేర ఆస్తి నష్టం సంభవించిందని యజమాని వాపోతున్నారు. రెవెన్యూ మరియు పోలీసు అధికారులు సంఘటనా స్థలానికి చేరుకుని నష్టం వివరాలను సేకరిస్తున్నారు.
#FireAccident #PoultryFarm #Chittoor #AndhraPradesh #ShortCircuit #PropertyLoss #FireSafety
