బాక్సాఫీస్ వద్ద పవన్ కళ్యాణ్ మాస్ జాతర

పవర్ స్టార్ పవన్ కళ్యాణ్, మాస్ డైరెక్టర్ హరీష్ శంకర్ క్రేజీ కాంబినేషన్‌లో వస్తున్న ‘ఉస్తాద్ భగత్ సింగ్’ చిత్రంపై ఎట్టకేలకు క్లారిటీ వచ్చింది. ఈ మోస్ట్ అవైటెడ్ మూవీని మార్చి 26న ప్రపంచవ్యాప్తంగా అత్యంత భారీ స్థాయిలో విడుదల చేయనున్నట్లు చిత్ర బృందం అధికారికంగా ప్రకటించింది. ఇప్పటికే షూటింగ్ పూర్తి చేసుకున్న ఈ చిత్రం, ప్రస్తుతం పోస్ట్ ప్రొడక్షన్ పనుల్లో వేగం పెంచింది. పవన్ కళ్యాణ్ మార్క్ మేనరిజమ్స్ మరియు హరీష్ శంకర్ డైలాగ్స్‌తో ఈ సినిమా థియేటర్లలో పూనకాలు తెప్పించడం ఖాయంగా కనిపిస్తోంది.

మళ్ళీ రిపీట్ కానున్న గబ్బర్ సింగ్ మ్యాజిక్

గతంలో పవన్ కళ్యాణ్ – హరీష్ శంకర్ కాంబినేషన్‌లో వచ్చిన ‘గబ్బర్ సింగ్’ ఇండస్ట్రీ రికార్డులను తిరగరాసింది. సుదీర్ఘ కాలం తర్వాత మళ్ళీ వీరిద్దరూ జతకట్టడంతో అంచనాలు ఆకాశాన్ని తాకుతున్నాయి. అభిమానిగా పవన్ కళ్యాణ్‌ను వెండితెరపై ఎలా చూడాలనుకుంటారో, హరీష్ శంకర్ ఈ సినిమాలో అంతకుమించి చూపించబోతున్నారని ఇండస్ట్రీ వర్గాలు చెబుతున్నాయి. దేవిశ్రీ ప్రసాద్ సంగీతంలో వచ్చిన ‘దేఖ్‌లేంగే సాలా’ గీతం ఇప్పటికే సోషల్ మీడియాను షేక్ చేస్తోంది.

పక్కా కమర్షియల్ వినోదాల విందు

కేవలం అభిమానులకే కాకుండా అన్ని వర్గాల ప్రేక్షకులను ఆకట్టుకునేలా వినోదభరితమైన ఎలిమెంట్స్‌తో ఈ చిత్రాన్ని మలిచారు. పవన్ కళ్యాణ్ పవర్‌ఫుల్ పోలీస్ ఆఫీసర్ పాత్రలో కనిపిస్తుండగా, యాక్షన్ మరియు కామెడీ డోస్ సమపాళ్లలో ఉండేలా జాగ్రత్తలు తీసుకున్నారు. మైత్రీ మూవీ మేకర్స్ బ్యానర్‌పై నవీన్ యెర్నేని, రవిశంకర్ యలమంచిలి ఎక్కడా రాజీ పడకుండా అత్యంత భారీ బడ్జెట్‌తో ఈ చిత్రాన్ని నిర్మించారు.

భారీ తారాగణంతో ‘ఉస్తాద్’ హంగామా

ఈ చిత్రంలో పవన్ కళ్యాణ్ సరసన యంగ్ సెన్సేషన్ శ్రీలీల, టాలెంటెడ్ బ్యూటీ రాశిఖన్నా కథానాయికలుగా నటిస్తున్నారు. వీరితో పాటు పార్థిబన్, కె.ఎస్. రవికుమార్, ఎల్.బి. శ్రీరామ్, రావు రమేష్, రాంకీ వంటి దిగ్గజ నటులు కీలక పాత్రల్లో కనిపించనున్నారు. సాంకేతికంగానూ ఉన్నతంగా ఉండబోతున్న ఈ చిత్రం మార్చిలో బాక్సాఫీస్ వద్ద సరికొత్త సంచలనాలు సృష్టించడానికి సిద్ధమవుతోంది.

#UstaadBhagatSingh #PawanKalyan #Harish Shankar #UBSonMarch26 #PowerStar #Sreeleela #TollywoodNews #MythriMovieMakers

Saran Kumar Thalapula