గజ్వేల్ అభివృద్ధి ప్రదాత కేసీఆర్..

గజ్వేల్ నియోజకవర్గాన్ని అన్ని రంగాల్లో అభివృద్ధి చేసిన ఘనత కేసీఆర్‌కే దక్కుతుందని మాజీ మంత్రి, ఎమ్మెల్యే హరీష్ రావు అన్నారు. మున్సిపల్ ఎన్నికల ప్రచారంలో భాగంగా ప్రజ్ఞాపూర్‌లో నిర్వహించిన రోడ్ షోలో ఆయన పాల్గొని ప్రసంగించారు. కాంగ్రెస్ ప్రభుత్వ వైఫల్యాలను ఎండగడుతూ, ప్రజలకు మేలు చేసిన వారికే ఓటు వేయాలని పిలుపునిచ్చారు. సంక్షేమ పథకాల అమలులో రేవంత్ రెడ్డి ప్రభుత్వం పూర్తిగా విఫలమైందని ఆయన విమర్శించారు.

గజ్వేల్ ముఖచిత్రాన్ని మార్చిన కేసీఆర్

ఒకప్పుడు పందులకు నిలయంగా ఉన్న గజ్వేల్ ఆస్పత్రిని నేడు 250 పడకల కార్పొరేట్ స్థాయి వైద్యశాలగా మార్చిన ఘనత కేసీఆర్‌దేనని హరీష్ రావు గుర్తుచేశారు. నియోజకవర్గానికి రైలు వసతి, ఆర్డీవో ఆఫీస్, అండర్ గ్రౌండ్ డ్రైనేజీతో పాటు చెరువుల సుందరీకరణను అద్భుతంగా చేపట్టారని వివరించారు. ఇంటింటికీ నల్లా నీరు అందించి మంచినీటి కష్టాలను తీర్చిన నాయకుడిని కాపాడుకోవాల్సిన బాధ్యత అందరిపై ఉందన్నారు.

రైతుబంధుపై రేవంత్ సర్కార్ నిర్లక్ష్యం

కరోనా వంటి కష్టకాలంలో కూడా కేసీఆర్ రైతుబంధు నిధులను ఆపలేదని, కానీ ప్రస్తుత ముఖ్యమంత్రి రేవంత్ రెడ్డి ఇప్పటికే రెండు విడతల నిధులను ఎగ్గొట్టారని మండిపడ్డారు. ఇది మూడో విడత అని, వెంటనే రైతుల ఖాతాల్లో డబ్బులు జమ చేయాలని డిమాండ్ చేశారు. ఎన్నికల కమిషన్ అభ్యంతరం చెబితే తామే లేఖ ఇస్తామని, 11వ తేదీలోపు నిధులు విడుదల చేయకపోతే రైతులు తిరగబడతారని హెచ్చరించారు.

సంక్షేమం వర్సెస్ బూతుల రాజకీయం

తెలంగాణను సాధించిన కేసీఆర్ జాతిపిత అయితే, రేవంత్ రెడ్డి బూతుల పితగా మారారని హరీష్ రావు ఎద్దేవా చేశారు. హామీల గురించి ప్రశ్నిస్తే అసభ్య పదజాలంతో మాట్లాడుతున్నారని విమర్శించారు. ఆడబిడ్డల పెళ్లికి కళ్యాణ లక్ష్మి, ప్రసవం తర్వాత కేసీఆర్ కిట్ వంటి పథకాలతో మేనమామలా అండగా నిలిచిన పార్టీ బీఆర్ఎస్ అని, కేవలం అక్షింతలు పంచే వారు అభివృద్ధి చేయలేరని స్పష్టం చేశారు.

కారు గుర్తుకే ఓటు వేసి గజ్వేల్ గౌరవాన్ని కాపాడుకుందాం

వచ్చే రెండేళ్లలో మళ్లీ కేసీఆర్ ప్రభుత్వం రావడం ఖాయమని, మున్సిపల్ ఎన్నికల్లో బీఆర్ఎస్ అభ్యర్థులను గెలిపించడం ద్వారా ప్రజ్ఞాపూర్ గౌరవాన్ని నిలబెట్టుకోవాలని కోరారు. ఎరువులు అందించడం కూడా చేతకాని దద్దమ్మ ప్రభుత్వం రాష్ట్రంలో ఉందని, మైనారిటీల కోసం ఒక్క రూపాయి కూడా ఖర్చు చేయలేదని నిలదీశారు. అభివృద్ధిని కాంక్షించే వారంతా కారు గుర్తుకే ఓటు వేయాలని విజ్ఞప్తి చేశారు.

#HarishRao #Gajwel #KCR #RevanthReddy #BRS #TelanganaPolitics #RythuBandhu #TelanganaElections #Development #PoliticalNews

Saran Kumar Thalapula