PY Reddy 
బండ్లపల్లి నుంచే ఉపాధి హామీకి తూట్లు: షర్మిల ఆవేదన
ఏపీసీసీ చీఫ్ వైఎస్ షర్మిలా రెడ్డి అనంతపురం జిల్లా నార్పల మండలం బండ్లపల్లి గ్రామం నుంచి మన్రేగా పరిరక్షణ యాత్రను ఘనంగా ప్రారంభించారు. సరిగ్గా 20 ఏళ్ల క్రితం, 2006 ఫిబ్రవరి 2న ఇదే గ్రామంలో దివంగత ముఖ్యమంత్రి వైఎస్ రాజశేఖరరెడ్డి ఉపాధి హామీ పథకానికి శ్రీకారం చుట్టారని ఆమె గుర్తు చేశారు. ఆనాడు వైఎస్సార్ వేసిన శిలాఫలకాన్ని సందర్శించిన షర్మిల, ఉపాధి కూలీలతో ముఖాముఖి మాట్లాడి వారి సమస్యలను అడిగి తెలుసుకున్నారు.
వైఎస్సార్ పాలన జనరంజకం.. నేడు పథకాలకు గ్రహణం
వైఎస్ రాజశేఖరరెడ్డి ఐదేళ్ల పాలనలో ప్రజలకు ఏం కావాలో అడిగి మరీ పథకాలు అందించారని షర్మిల కొనియాడారు. ఆరోగ్యశ్రీ, ఫీజు రీయింబర్స్మెంట్, ఉచిత విద్యుత్ వంటి పథకాలతో పేదల జీవితాల్లో వెలుగులు నింపిన మహానాయకుడు వైఎస్సార్ అని స్మరించుకున్నారు. కాంగ్రెస్ హయాంలో సోనియా గాంధీ, మన్మోహన్ సింగ్ నేతృత్వంలో ఈ పథకం నిరంతరాయంగా సాగిందని, కానీ నేడు బీజేపీ ప్రభుత్వం దీనికి గ్రహణం పట్టించిందని మండిపడ్డారు.
50 రోజులు పని ఇవ్వని వారు.. 125 రోజులు ఇస్తారా?
కాంగ్రెస్ హయాంలో ఏడాదికి 100 రోజులు ఖచ్చితంగా పని దొరికేదని, ఇప్పుడు 50 రోజులు పని ఇవ్వడమే గగనంగా మారిందని షర్మిల విమర్శించారు. ఏటా లక్షలాది జాబ్ కార్డులను కేంద్రం రద్దు చేస్తోందని, గత ఏడాదిలోనే 20 లక్షల కార్డులు తొలగించారని ఆరోపించారు. 50 రోజులే పని కల్పించలేని పాలకులు, 125 రోజులు పని ఇస్తామంటే నమ్మడానికి తాము గొర్రెలం కాదని ఆమె కేంద్రాన్ని ఎద్దేవా చేశారు.
రాష్ట్రంపై 5 వేల కోట్ల భారం.. చంద్రబాబు తీరుపై విమర్శలు
కొత్తగా తెచ్చిన వీబీజీ రామ్ జీ చట్టం వల్ల రాష్ట్రాలపై అదనపు భారం పడుతుందని షర్మిల ఆందోళన వ్యక్తం చేశారు. గతంలో కేంద్రమే 100 శాతం నిధులు ఇచ్చేదని, ఇప్పుడు రాష్ట్రాలు 40 శాతం భరించాలనడం దుర్మార్గమన్నారు. ఇప్పటికే 10 లక్షల కోట్ల అప్పుల్లో ఉన్న ఆంధ్రప్రదేశ్, ఈ పథకం కోసం మరో 5 వేల కోట్లు ఎక్కడి నుంచి తెస్తుందని నిలదీశారు. ఈ చట్టానికి ముఖ్యమంత్రి చంద్రబాబు మద్దతు తెలపడం రాష్ట్ర ప్రయోజనాలను తాకట్టు పెట్టడమేనని ఆమె విమర్శించారు.
#YSSharmila #MGNREGA #Congress #AndhraPradesh #EmploymentGuarantee #Anantapur #YSRCP #TDP #BreakingNews
