తిరుమల రద్దీ: అక్టోపస్ భవనం దాటిన క్యూలైన్లు, 20 గంటల నిరీక్షణ!

Lakshmi MS, Tirupati Posted on 15 hours ago

రథసప్తమి (సూర్య జయంతి) పర్వదినాన్ని పురస్కరించుకుని తిరుమల గిరులు భక్తులతో కిక్కిరిసిపోయాయి, ఒకే రోజు ఏడు వాహనాలపై శ్రీ మలయప్ప స్వామి వారిని దర్శించుకునేందుకు లక్షలాది మంది తరలిరావడంతో సర్వదర్శనం క్యూలైన్లు అక్టోపస్ భవనం (గోగర్భం డ్యామ్ సర్కిల్) వరకు కిలోమీటర్ల మేర సాగి నిరీక్షణ సమయం 20 గంటలుగా నమోదైంది.

జనవరి 25, 2026 ఆదివారం ‘రథసప్తమి’ రోజున ఏకంగా 84,014 మంది భక్తులు శ్రీవారిని దర్శించుకోగా, హుండీ ద్వారా రూ. 3.69 కోట్ల ఆదాయం లభించింది.

నిన్న తెల్లవారుజామున 5:30 గంటల నుండి రాత్రి 9:00 గంటల వరకు మలయప్ప స్వామి వారు ఏడు వేర్వేరు వాహనాలపై మాడ వీధుల్లో విహరిస్తూ భక్తులకు కనువిందు చేశారు. ఈ క్రమంలో నిన్న ఒక్కరోజే 35,131 మంది భక్తులు తలనీలాలు సమర్పించి మొక్కులు చెల్లించుకున్నారు.

జనవరి 26వ తేదీ సోమవారం ఉదయం సమయానికి వైకుంఠం క్యూ కాంప్లెక్స్‌లోని కంపార్ట్‌మెంట్లన్నీ నిండిపోయి, క్యూలైన్లు వెలుపల ఉన్న అక్టోపస్ భవనం వరకు బారులు తీరాయి.

రద్దీ దృష్ట్యా నేటి వరకు (జనవరి 26) తిరుపతిలో ఎస్ఎస్‌డీ (SSD) టోకెన్ల జారీని టీటీడీ రద్దు చేసిన విషయం తెలిసిందే, రేపటి నుండి టోకెన్ల జారీ యథావిధిగా కొనసాగనుంది.