అనంతపురంలో అరాచక పాలన: ‘దండుపాళ్యం’ బ్యాచ్పై అనంత వెంకటరామిరెడ్డి ఫైర్!
ఎమ్మెల్యే దగ్గుపాటి ప్రసాద్ నాయకత్వంలో కబ్జాలు, దౌర్జన్యాలు.. చంద్రబాబు, లోకేష్ ఆశీస్సులతోనే బందిపోటు ముఠా ఆగడాలంటూ వైసీపీ జిల్లా అధ్యక్షుల తీవ్ర ఆరోపణలు.
19 నెలల అరాచకం.. నగరంపై గద్దల్లా వాలుతున్న ముఠా!
అనంతపురం నగరం ప్రశాంతతకు మారుపేరుగా ఉండేదని, కానీ కూటమి ప్రభుత్వం అధికారంలోకి వచ్చాక ఇక్కడ ‘దండుపాళ్యం’ సినిమా తరహాలో ఒక ప్రమాదకరమైన బ్యాచ్ తయారైందని వైఎస్ఆర్సీపీ జిల్లా అధ్యక్షులు అనంత వెంకటరామిరెడ్డి ధ్వజమెత్తారు. శుక్రవారం అనంతపురంలో ఏర్పాటు చేసిన మీడియా సమావేశంలో ఆయన మాట్లాడుతూ, ఎమ్మెల్యే దగ్గుపాటి ప్రసాద్ ఈ బందిపోటు ముఠాకు నాయకత్వం వహిస్తున్నారని ఆరోపించారు. గత 19 నెలలుగా నగరంలో ఎక్కడ ఖాళీ స్థలం కనిపించినా ఎమ్మెల్యే అనుచరులు గద్దల్లా వాలిపోతున్నారని, కంచెలు వేసి కబ్జాలకు పాల్పడుతున్నారని మండిపడ్డారు. ముఖ్యమంత్రి చంద్రబాబు, నారా లోకేష్ ఆశీస్సులు తమకున్నాయని చెబుతూ ఈ ముఠా బరితెగిస్తోందని ఆయన విమర్శించారు.
నగరంలో కొత్తగా ఇల్లు కట్టుకోవాలన్నా, షోరూంలు ప్రారంభించాలన్నా, చివరికి థియేటర్లో సినిమా ఆడించాలన్నా ఎమ్మెల్యే కార్యాలయం నుంచి ‘పర్మిషన్’ తీసుకోవాల్సిన దౌర్భాగ్య స్థితి నెలకొందని వెంకటరామిరెడ్డి ఆవేదన వ్యక్తం చేశారు. ప్రభుత్వ కార్యాలయాలు కూడా ఎమ్మెల్యే కనుసన్నల్లోనే నడుస్తున్నాయని, పోలీసులు సైతం అధికార పార్టీ నేతలకు అడుగులకు మడుగులు ఒత్తుతున్నారని దుయ్యబట్టారు. గతంలో ఏ ప్రభుత్వం ఉన్నా ఇలాంటి అరాచక పరిస్థితులు లేవని, ఫ్యాక్షనిస్టులు ఉన్న కాలంలో కూడా నగరం ఇంత భయానకంగా లేదని ఆయన గుర్తు చేశారు.
జిల్లా ఎస్పీ, డీఐజీలు ఈ అరాచకాలను పట్టించుకోవడం లేదని, పోలీసు ఉన్నతాధికారుల ఉదాసీనత వల్లే దండుపాళ్యం బ్యాచ్ రెచ్చిపోతోందని ఆయన విమర్శించారు. సోషల్ మీడియా పోస్టులపై చూపే ఉత్సాహం ఈ ముఠా నాయకులను అరెస్ట్ చేయడంలో ఎందుకు లేదని పోలీసులను ప్రశ్నించారు. ఈ పాలేగాళ్ల రాజ్యానికి ఎవరూ భయపడొద్దని, బాధితులకు వైఎస్ఆర్సీపీతో పాటు ప్రశాంతత కోరుకునే అన్ని పార్టీలు, ప్రజాసంఘాలు అండగా ఉంటాయని ఆయన భరోసా ఇచ్చారు. ఈ ముఠాలోని 15-20 మంది సభ్యుల బ్యాంక్ లావాదేవీలు పరిశీలిస్తే వాస్తవాలు వెలుగులోకి వస్తాయని డిమాండ్ చేశారు.
#AnantapurPolitics #DandupalyamBatch #YSRCPvsTDP #StopLandGrabbing #AndhraPradeshCrime
PY Reddy 
Gayathri M, Vijayawada