యూపీలో ఎన్నికల సంఘం చర్యలపై నాకు నమ్మకం లేదు: అఖిలేష్ యాదవ్

ఉత్తరప్రదేశ్‌లోని తొమ్మిది అసెంబ్లీ స్థానాలకు జరుగుతున్న ఉప ఎన్నికల సందర్భంగా ఎన్నికల సంఘం వ్యవహరిస్తున్న తీరుపై అఖిలేష్ యాదవ్ తీవ్ర అభ్యంతరం వ్యక్తం చేశారు.

సమాజ్ వాదీ పార్టీకి మద్దతుగా ఉండే వర్గాల ఓట్లను ఓటర్ల జాబితా నుండి ఉద్దేశపూర్వకంగా తొలగిస్తున్నారని ఆయన ఆరోపించారు. ఈ విషయంలో ఎన్నికల సంఘం నిష్పక్షపాతంగా వ్యవహరించడం లేదని మండిపడ్డారు. ఓటు వేయడానికి వచ్చే ఓటర్ల ఐడీ కార్డులను తనిఖీ చేసే అధికారం పోలీసులకు లేదని, కానీ యూపీలో పోలీసులు ఓటర్లను అడ్డుకుంటూ భయాందోళనలకు గురిచేస్తున్నారని ఫిర్యాదు చేశారు. ఎన్నికల యంత్రాంగం మొత్తం అధికార బీజేపీకి తొత్తుగా మారిందని, ప్రజాస్వామ్య విలువలను కాలరాస్తున్నారని అఖిలేష్ ధ్వజమెత్తారు. పోలీసులు ఓటర్లను అడ్డుకుంటున్న వీడియోలను ఆయన స్వయంగా సోషల్ మీడియాలో షేర్ చేస్తూ, ఎన్నికల సంఘం వెంటనే స్పందించి బాధ్యులైన అధికారులపై చర్యలు తీసుకోవాలని డిమాండ్ చేశారు.

ఎన్నికల సంఘం స్వతంత్రంగా పనిచేయడం లేదని, క్షేత్రస్థాయిలో జరుగుతున్న అక్రమాలను అరికట్టడంలో విఫలమైందని అఖిలేష్ యాదవ్ తన అసంతృప్తిని వ్యక్తం చేశారు. న్యాయమైన ఎన్నికలు జరగడం లేదని ఆయన ఆరోపించారు.

#AkhileshYadav #SamajwadiParty #UPBypolls #ElectionCommission #VoterFraud #UPPolitics #Democracy  #IndiaAlliance

Saran Kumar Thalapula