Saran Kumar Thalapula 
Lakshmi MS, Tirupati 
అంబేడ్కర్ కోనసీమ జిల్లా మలికిపురం మండలం ఇరుసుమండలో సంభవించిన ఓఎన్జీసీ గ్యాస్ బావి బ్లోఅవుట్ ప్రాంతాన్ని ముఖ్యమంత్రి నారా చంద్రబాబు నాయుడు శుక్రవారం (జనవరి 9, 2026) సందర్శించారు. హెలికాప్టర్లో ఏరియల్ సర్వే నిర్వహించి మంటల తీవ్రతను, చుట్టుపక్కల జరిగిన నష్టాన్ని స్వయంగా పరిశీలించారు. అనంతరం రాయవరంలో ఓఎన్జీసీ ఉన్నతాధికారులు, జిల్లా కలెక్టర్ మహేష్ కుమార్తో కలిసి తాజా పరిస్థితిపై సమీక్ష నిర్వహించారు. ఐదో రోజు కూడా మంటలు పూర్తిగా అదుపులోకి రాకపోవడంతో, తీసుకోవాల్సిన తక్షణ చర్యలపై అధికారులకు దిశానిర్దేశం చేశారు. ముఖ్యంగా మంటల ధాటికి కాలిపోయిన కొబ్బరి చెట్లకు, దెబ్బతిన్న పంటలకు యుద్ధ ప్రాతిపదికన నష్టపరిహారం అందించాలని ఆదేశించారు.
ఐదో రోజులుగీ మండుతూనే ఉంది.
ఇరుసుమండలోని ‘మోరి-5’ బావి వద్ద సోమవారం మధ్యాహ్నం ప్రారంభమైన ఈ బ్లోఅవుట్ను అదుపు చేసేందుకు ఓఎన్జీసీ నిపుణులు అహర్నిశలు శ్రమిస్తున్నారు. ప్రస్తుతం అక్కడ ‘వాటర్ అంబ్రెల్లా’ (Water Umbrella) ప్రక్రియను ఉపయోగిస్తున్నారు. బావి చుట్టూ నీటిని గొడుగు ఆకారంలో స్ప్రే చేయడం ద్వారా ఉష్ణోగ్రతలను తగ్గించి, గ్యాస్ ఇతర ప్రాంతాలకు వ్యాపించకుండా నియంత్రిస్తున్నారు. ఇప్పటికే ఢిల్లీ, ముంబైల నుంచి వచ్చిన నిపుణుల బృందం సహాయంతో డెబ్రిస్ (శిథిలాల) తొలగింపు ప్రక్రియ జరుగుతోంది. ఈ శిథిలాలను పూర్తిగా తొలగించిన తర్వాతే బావి ముఖద్వారాన్ని మూసివేసే (Capping) ప్రక్రియ ప్రారంభమవుతుందని అధికారులు ముఖ్యమంత్రికి వివరించారు.
వెనుజులా వంటి చమురు నిక్షేపాలు అధికంగా ఉన్న దేశాల్లో ఇటువంటి బ్లోఅవుట్ ప్రమాదాలు సంభవించినప్పుడు అనుసరించే అంతర్జాతీయ ప్రమాణాలను ఇక్కడ కూడా అమలు చేయాలని సీఎం సూచించారు. అవసరమైతే అమెరికాకు చెందిన ‘వైల్డ్ వెల్ కంట్రోల్’ (Wild Well Control) సంస్థ నిపుణుల సహాయం తీసుకోవాలని అధికారులను ఆదేశించారు. గతంలో పాశర్లపూడిలో జరిగిన ప్రమాదాన్ని గుర్తుచేస్తూ, గ్యాస్ పీడనం తగ్గేవరకు అప్రమత్తంగా ఉండాలని చెప్పారు. సమీప గ్రామాల ప్రజలకు తాగునీరు, ఆహారం పంపిణీలో లోటు లేకుండా చూడాలని, పర్యావరణ కాలుష్య స్థాయిలను నిరంతరం పర్యవేక్షించాలని పొల్యూషన్ కంట్రోల్ బోర్డ్ అధికారులకు సూచించారు.
రైతులకు ఊరట: కొబ్బరి తోటల నష్టానికి పరిహారం
కోనసీమలో పాడి-పంటలే ఆధారంగా జీవించే రైతులకు ఈ ప్రమాదం పెద్ద దెబ్బ తగిలింది. మంటల వేడికి సుమారు 75కు పైగా కొబ్బరి చెట్లు కాలిపోగా, మూడు ఎకరాల్లో ఇతర పంటలు దెబ్బతిన్నాయి. దీనిపై స్పందించిన ముఖ్యమంత్రి, నిబంధనల ప్రకారం కాకుండా మానవతా దృక్పథంతో రైతులకు గరిష్ట పరిహారం అందేలా చూడాలని కలెక్టర్ను ఆదేశించారు. బాధితులకు ప్రభుత్వం అండగా ఉంటుందని, నష్టపోయిన ప్రతి రైతుకూ న్యాయం చేస్తామని భరోసా ఇచ్చారు. భవిష్యత్తులో ఇటువంటి ప్రమాదాలు పునరావృతం కాకుండా ఓఎన్జీసీ తన భద్రతా ప్రమాణాలను పెంచుకోవాలని, పాత పైపులైన్ల స్థానంలో కొత్తవి ఏర్పాటు చేయాలని గట్టిగా చెప్పారు.
సమీక్షా సమావేశంలో హోంమంత్రి వనిత, జిల్లా యంత్రాంగం కూడా పాల్గొన్నారు. దాదాపు 600 మంది గ్రామస్థులను పునరావాస కేంద్రాలకు తరలించామని, ప్రస్తుతం పరిస్థితి 90 శాతం అదుపులోనే ఉందని అధికారులు తెలిపారు. గ్యాస్ లీక్ కారణంగా ప్రజలు భయాందోళనకు గురికావద్దని, ప్రభుత్వం అన్ని జాగ్రత్తలు తీసుకుంటుందని సీఎం పునరుద్ఘాటించారు. బ్లోఅవుట్ అదుపులోకి వచ్చే వరకు జిల్లా యంత్రాంగం అక్కడే మకాం వేసి పర్యవేక్షించాలని చంద్రబాబు నాయుడు స్పష్టం చేశారు. ఈ పర్యటనతో కోనసీమ వాసుల్లో కొంత ధైర్యం నెలకొంది.
#KonaseemaBlowout #Irusumanda #ChandrababuNaidu #ONGC #GasLeak #AndhraPradeshNews #DisasterManagement
Gayathri M, Vijayawada 
PY Reddy