అమరావతి, జూన్ 9: ఆంధ్రప్రదేశ్‌ను వికసిత రాష్ట్రంగా తీర్చిదిద్దే దిశగా ముఖ్యమంత్రి నారా చంద్రబాబు నాయుడు పెద్దపీట వేశారు. రాష్ట్రంలోని 26 జిల్లాలు, 175 నియోజకవర్గాల్లో విజన్ యాక్షన్ ప్లాన్ యూనిట్ కార్యాలయాలను వర్చువల్‌గా ప్రారంభించారు. ఈ కార్యాలయాలతో స్వర్ణాంధ్ర-2047 విజన్‌ను ముందుకు తీసుకెళ్లే ప్రణాళికకు శంకుస్థాపన జరిగింది. ‘‘ఎమ్మెల్యేలకు నియోజకవర్గ స్థాయిలో కార్యాలయాలే లేవు. ఈ కార్యాలయాలతో ఆ లోటు తీర్చబడింది. ప్రతి యూనిట్‌లో 9 మంది టీమ్ ఉంటుంది. అమలు బాధ్యత ఎంపీలు, ఎమ్మెల్యేలు, కలెక్టర్లు, అధికారులు మీదే’’ అని సీఎం పేర్కొన్నారు. ప్రజల భాగస్వామ్యంతో ముందుకు వెళ్లాలని సూచించారు.
ప్రతి నియోజకవర్గం ఎమ్మెల్యే అధ్యక్షుడుగా, స్పెషల్ ఆఫీసర్ కార్యనిర్వాహక ఉపాధ్యక్షుడిగా వ్యవహరిస్తారు. టీమ్‌లో అకడెమిషియన్, యువ ప్రొఫెషనల్, GSWS స్టాఫ్ ఉంటారు. ప్రతి కార్యాలయానికి రూ.10 లక్షలు బడ్జెట్ కేటాయిస్తామని ముఖ్యమంత్రి తెలిపారు. రాష్ట్రానికి పేదరికం లేకుండా, అధిక ఆదాయం కలిగిన హెల్తీ, హ్యాపీ సమాజం లక్ష్యంగా 10 ప్రధాన సూత్రాలు రూపొందించినట్టు చెప్పారు. వాటిలో నైపుణ్యాభివృద్ధి, నీటి భద్రత, లాజిస్టిక్స్, బ్రాండింగ్, డీప్ టెక్, పర్యావరణ పరిరక్షణ వంటి అంశాలు ఉన్నాయి.
ఇకపోతే పోలవరం ఆలస్యంకి గత ప్రభుత్వ హయాంలో డయాఫ్రమ్ వాల్ పరిరక్షణ లోపమే కారణం అని చంద్రబాబు విమర్శించారు. ‘‘అమరావతిని 2028 నాటికి నిర్మిస్తాం, భోగాపురం ఎయిర్ పోర్ట్ 2026 నాటికి సిద్ధమవుతుంది, విశాఖను ముంబయిగా అభివృద్ధి చేస్తాం. 15 లక్షల బంగారు కుటుంబాల దత్తత కార్యక్రమంను ఆగస్ట్ 15 కల్లా పూర్తి చేస్తాం. జీరో పావర్టీ–పీ4 పేరుతో ఈ కార్యక్రమాన్ని పర్యవేక్షిస్తాం’’ అని వివరించారు.
కేంద్ర మంత్రి రామ్మోహన్ నాయుడు ఈ కార్యక్రమంలో పాల్గొని 10 బంగారు కుటుంబాలను దత్తత తీసుకుంటానని ప్రకటించగా, సీఎం ఆయనను అభినందించారు. ఇతర ప్రజాప్రతినిధులు కూడా దీనిని అనుసరించాలని పిలుపునిచ్చారు. కార్యక్రమంలో రాష్ట్ర మంత్రులు, ఎమ్మెల్యేలు, కలెక్టర్లు, అధికారులు పాల్గొన్నారు. ఈ యూనిట్లు 15% వృద్ధి దిశగా రాష్ట్రాన్ని నడిపిస్తాయని సీఎం ధీమా వ్యక్తం చేశారు.
