TG: కరీంనగర్లో KCR పోరుబాట

తెలంగాణ రాజకీయాల్లో మరో కీలక పరిణామానికి వేదిక సిద్ధమవుతోంది. భారత రాష్ట్ర సమితి (BRS) తన వార్షిక ప్లీనరీని ఈసారి ఉమ్మడి కరీంనగర్ జిల్లాలో నిర్వహించాలని నిర్ణయించింది. ఉద్యమ కాలం నుంచి అచ్చివచ్చిన గడ్డపై భారీ బహిరంగ సభ ద్వారా పార్టీలో కొత్త ఉత్సాహం నింపాలని గులాబీ బాస్ కేసీఆర్ భావిస్తున్నారు. గత ఎన్నికల్లో ఆశించిన ఫలితాలు రాని ఉత్తర తెలంగాణలో తిరిగి పట్టు సాధించడమే లక్ష్యంగా ఈ ప్లీనరీ సాగనుంది.

సెంటిమెంట్ గడ్డపై భారీ స్కెచ్

కరీంనగర్ జిల్లా బీఆర్‌ఎస్‌కు ఎప్పుడూ వెన్నెముకగా నిలుస్తూ వస్తోంది. అందుకే ఈ నెల 27న నిర్వహించబోయే ప్లీనరీని ఇక్కడే ఏర్పాటు చేసి, కేడర్‌లో భరోసా నింపాలని అధిష్టానం యోచిస్తోంది. గత ఏడాది కాలంగా కేసీఆర్ జనంలోకి రావడం లేదన్న విమర్శలకు ఈ సభ ద్వారా చెక్ పెట్టాలని, పార్టీ శ్రేణులను ఎన్నికల మూడ్‌లోకి తీసుకెళ్లాలని గులాబీ శ్రేణులు భావిస్తున్నాయి.

తెలంగాణ అప్పులపై ప్రత్యేక అధ్యయనం.. పైలట్ ప్రాజెక్ట్‌గా బీఐఎస్ పరిశీలన ఈ వార్తను కూడా చదవండి

గులాబీ గూటికి జీవన్ రెడ్డి?

ఈ ప్లీనరీ వేదికగానే కాంగ్రెస్ సీనియర్ నేత, మాజీ మంత్రి టీ. జీవన్ రెడ్డి బీఆర్‌ఎస్‌లో చేరబోతున్నట్లు జోరుగా ప్రచారం సాగుతోంది. రాజకీయాల్లో అపార అనుభవం ఉన్న జీవన్ రెడ్డి చేరికతో ఉమ్మడి కరీంనగర్ జిల్లాలో పార్టీకి మరింత బలం పెరుగుతుందని కేసీఆర్ లెక్కలేస్తున్నారు. ఈ భారీ బహిరంగ సభలో ఆయనకు గులాబీ కండువా కప్పి పార్టీలోకి ఆహ్వానించడం ద్వారా కాంగ్రెస్ సర్కార్‌కు గట్టి హెచ్చరిక పంపాలని చూస్తున్నారు.

జనంలో ఉంటారా.. గర్జిస్తారా?

గత ప్లీనరీలో “ఇకపై జనంలోనే ఉంటా” అని ప్రకటించినా, ఆచరణలో అది సాధ్యం కాలేదన్న విమర్శలు కేసీఆర్‌పై ఉన్నాయి. నాడు సొంత కుమార్తె కవిత సైతం కేసీఆర్ ప్రసంగంలో పస లేదని అసంతృప్తి వ్యక్తం చేసినట్లు వార్తలు వచ్చాయి. ఈ నేపథ్యంలో, 2026లో వరుస సభలు నిర్వహిస్తామని ఇచ్చిన హామీ మేరకు.. ఈ కరీంనగర్ ప్లీనరీ తర్వాత అయినా కేసీఆర్ నిరంతరం ప్రజల్లో ఉంటూ ప్రభుత్వంపై పోరాటం చేస్తారా అన్నది ఇప్పుడు ఆసక్తికరంగా మారింది.

#BRSPlenary #KCR #Karimnagar #TelanganaPolitics #JeevanReddy #KCRPublicMeeting #BRSParty #NorthTelangana

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.