తెలంగాణ పాలిటిక్స్లో బిగ్ ట్విస్ట్: ఏప్రిల్ 25న కల్వకుంట్ల కవిత కొత్త పార్టీ ప్రకటన..!
హైదరాబాద్: తెలంగాణ రాజకీయ యవనికపై మరో కీలక పరిణామం చోటుచేసుకోబోతోంది. గత కొంతకాలంగా తన రాజకీయ భవిష్యత్తుపై నెలకొన్న ఉత్కంఠకు తెరదించుతూ, తెలంగాణ జాగృతి అధ్యక్షురాలు, మాజీ ఎమ్మెల్సీ కల్వకుంట్ల కవిత సంచలన ప్రకటన చేశారు. ఏప్రిల్ 25వ తేదీన తాను కొత్త రాజకీయ పార్టీని ప్రారంభించబోతున్నట్లు ఆమె వెల్లడించారు. నిజామాబాద్లో శుక్రవారం నిర్వహించిన ప్రెస్ మీట్లో ఆమె ఈ వివరాలను పంచుకున్నారు.
మేడ్చల్లో జెండా ఆవిష్కరణ
వచ్చే నెల ఏప్రిల్ 25న ఉదయం 10 గంటలకు మేడ్చల్ జిల్లాలోని మునీరాబాద్ (అద్వయ కన్వెన్షన్స్) వేదికగా పార్టీ జెండాను ఆవిష్కరించి, పార్టీ పేరును అధికారికంగా ప్రకటించనున్నట్లు కవిత తెలిపారు. ఇప్పటికే ఈ పార్టీ రిజిస్ట్రేషన్ కోసం కేంద్ర ఎన్నికల సంఘానికి దరఖాస్తు చేసినట్లు సమాచారం. ‘తెలంగాణ ప్రజా జాగృతి’ అనే పేరును ఆమె ఖరారు చేసినట్లు తెలుస్తోంది.
మహిళా నాయకత్వమే లక్ష్యం
ఈ సందర్భంగా కవిత మాట్లాడుతూ.. తెలంగాణ రాష్ట్రం ఏర్పడిన పదేళ్ల తర్వాత కూడా నీళ్లు, నిధులు, నియామకాల లక్ష్యం పూర్తిస్థాయిలో నెరవేరలేదని అభిప్రాయపడ్డారు. “తెలంగాణ ఆడబిడ్డగా, రాష్ట్ర అభ్యున్నతి కోసం ఒక కొత్త రాజకీయ శక్తి అవసరమని నేను బలంగా నమ్ముతున్నాను. ముఖ్యంగా మహిళా నాయకత్వంలో అందరినీ కలుపుకునిపోయే రాజకీయ పక్షం రావాల్సిన సమయం ఆసన్నమైంది” అని ఆమె పేర్కొన్నారు. ఇది ఏ పార్టీకి ‘బీ-టీమ్’ కాదని, స్వతంత్రంగా ప్రజల పక్షాన పోరాడుతుందని స్పష్టం చేశారు.
యువతకు పిలుపు.. ‘సర్వోదయ’ నినాదం
గాంధీజీ ఆశయమైన ‘సర్వోదయ’ (అందరి అభ్యున్నతి) అజెండాతో ఈ పార్టీ ముందుకు సాగనుంది. రాజకీయాలకు దూరంగా ఉంటున్న యువతను వ్యవస్థలోకి తీసుకురావడమే తన ప్రధాన ఉద్దేశమని కవిత చెప్పారు. “రాజకీయాల్లో మార్పు రావాలంటే యువత భాగస్వామ్యం తప్పనిసరి. కేవలం ఓటు బ్యాంకు రాజకీయాలకు పరిమితం కాకుండా, తెలంగాణలోని ప్రతి సామాజిక వర్గం సమస్యలను పరిష్కరించడమే మా లక్ష్యం” అని ఆమె ఉద్ఘాటించారు.
రాజకీయ సమీకరణాల్లో మార్పులు?
బీఆర్ఎస్ నుంచి బయటకు వచ్చిన తర్వాత కవిత సొంతంగా పార్టీ పెట్టడం ఇప్పుడు రాష్ట్రవ్యాప్తంగా చర్చనీయాంశంగా మారింది. తెలంగాణ సెంటిమెంట్తో పాటు సామాజిక న్యాయం, మహిళా సాధికారతను అజెండాగా మార్చుకుని ఆమె ప్రజల్లోకి వెళ్లనున్నారు. ఇప్పటికే క్షేత్రస్థాయిలో ‘జాగృతి జనం బాట’ ద్వారా ప్రజల కష్టాలను తెలుసుకుంటున్న కవిత, రాబోయే అసెంబ్లీ ఎన్నికల్లో తన పార్టీ తరపున అభ్యర్థులను నిలబెట్టే అవకాశం ఉంది.
తెలంగాణలో ఇప్పటికే అధికార కాంగ్రెస్, ప్రధాన ప్రతిపక్షం బీఆర్ఎస్, బీజేపీల మధ్య త్రిముఖ పోరు నడుస్తోంది. ఈ తరుణంలో కవిత ఎంట్రీతో సమీకరణాలు ఎలా మారుతాయో వేచి చూడాలి. ఏప్రిల్ 25న ప్రకటించబోయే పార్టీ విధివిధానాలు, అజెండాపైనే ఇప్పుడు అందరి దృష్టి నెలకొంది.
