ఐపీఎల్ 2026 షెడ్యూల్ వచ్చేసింది

తొలి పోరులో ఆరెంజ్ ఆర్మీతో తలపడనున్న డిఫెండింగ్ ఛాంపియన్ ఆర్సీబీ!

క్రికెట్ ప్రేమికులు ఎప్పుడెప్పుడా అని ఎదురుచూస్తున్న ఐపీఎల్ 19వ సీజన్ నగారా మోగింది. ఐపీఎల్ 2026 షెడ్యూల్‌పై బీసీసీఐ కీలక అప్‌డేట్ ఇస్తూ, తొలి దశకు సంబంధించిన 20 మ్యాచ్‌ల వివరాలను వెల్లడించింది. మార్చి 28న బెంగళూరులోని చిన్నస్వామి స్టేడియంలో డిఫెండింగ్ ఛాంపియన్ రాయల్ ఛాలెంజర్స్ బెంగళూరు (RCB), సన్‌రైజర్స్ హైదరాబాద్ (SRH) మధ్య జరిగే మ్యాచ్‌తో ఈ మెగా టోర్నీ ప్రారంభం కానుంది. అసెంబ్లీ ఎన్నికల నేపథ్యంలో భద్రతా కారణాల దృష్ట్యా షెడ్యూల్‌ను రెండు విడతల్లో విడుదల చేయాలని బీసీసీఐ నిర్ణయించింది.

మార్చి 28 నుంచి మే 31 వరకు క్రికెట్ పండుగ

ఐపీఎల్ 2026 సీజన్ మార్చి 28న ప్రారంభమై మే 31 వరకు కొనసాగనుంది. బీసీసీఐ కార్యదర్శి దేవాజిత్ సైకియా తెలిపిన వివరాల ప్రకారం, ప్రస్తుతం మార్చి 28 నుండి ఏప్రిల్ 12 వరకు జరిగే మొదటి 20 మ్యాచ్‌ల షెడ్యూల్‌ను మాత్రమే ఖరారు చేశారు. ఈ తొలి దశలో 10 వేదికల్లో మ్యాచ్‌లు నిర్వహించనున్నారు. దేశవ్యాప్తంగా ఉన్న క్రికెట్ అభిమానులకు ఈ రెండు నెలల పాటు నాన్-స్టాప్ వినోదం అందనుంది.

ఎన్నికల నేపథ్యంలోనే విడతల వారీగా షెడ్యూల్

పశ్చిమ బెంగాల్, అసోం, తమిళనాడు మరియు కేరళ రాష్ట్రాల్లో జరగనున్న అసెంబ్లీ ఎన్నికల కారణంగానే పూర్తి షెడ్యూల్‌ను ఒకేసారి ప్రకటించలేదని బీసీసీఐ స్పష్టం చేసింది. ఎన్నికల తేదీలు ఖరారైన తర్వాత, వాటితో మ్యాచ్‌లు క్లాష్ అవ్వకుండా మిగిలిన షెడ్యూల్‌ను రూపొందించనున్నారు. గతంలో 2024 లోక్‌సభ ఎన్నికల సమయంలో కూడా బీసీసీఐ ఇదే తరహాలో విడతల వారీగా షెడ్యూల్‌ను విడుదల చేసిన సంగతి తెలిసిందే.

తొలి మ్యాచ్‌లోనే ‘తెలుగు’ టీమ్ ఫైట్

సీజన్ ఆరంభ వేడుకల అనంతరం జరిగే తొలి మ్యాచ్‌లోనే సన్‌రైజర్స్ హైదరాబాద్ బరిలోకి దిగుతుండటంతో తెలుగు అభిమానుల్లో ఉత్సాహం నెలకొంది. గత సీజన్ ఛాంపియన్‌గా నిలిచిన ఆర్సీబీని వారి సొంత గడ్డపైనే ఢీకొట్టేందుకు కావ్య మారన్ సేన సిద్ధమవుతోంది. తొలి దశలో మొత్తం 4 డబుల్ హెడర్ (రోజుకు రెండు మ్యాచ్‌లు) మ్యాచ్‌లు ఉండనున్నాయి. మధ్యాహ్నం మ్యాచ్‌లు 3:30 గంటలకు, రాత్రి మ్యాచ్‌లు 7:30 గంటలకు ప్రారంభమవుతాయి.

IPL2026 #IPLSchedule #BCCI #RCBvsSRH #CricketNews #IPLUpdate #TATAIPL2026 #IndianPremierLeague

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.