కొలంబోలో భారత్ జైత్రయాత్ర: పాకిస్థాన్పై ఘనవిజయం..
టీ20 ప్రపంచకప్లో చిరకాల ప్రత్యర్థి పాకిస్థాన్తో జరిగిన హైవోల్టేజ్ పోరులో టీమిండియా అద్భుత విజయాన్ని అందుకుంది. బ్యాటింగ్, బౌలింగ్ విభాగాల్లో సమష్టిగా రాణించిన భారత్ 61 పరుగుల భారీ తేడాతో పాక్ను చిత్తు చేసింది. కొలంబోలోని ప్రేమదాస స్టేడియం వేదికగా జరిగిన ఈ మ్యాచ్లో గెలవడంతో భారత్ అధికారికంగా సూపర్-8 దశకు అర్హత సాధించింది. ప్రపంచకప్ చరిత్రలో పాకిస్థాన్పై భారత్కు ఇది ఎనిమిదో విజయం కావడం విశేషం.
ఇషాన్ కిషన్ విధ్వంసం.. భారత్ భారీ స్కోరు
టాస్ ఓడి తొలుత బ్యాటింగ్ చేసిన టీమిండియాకు ఆరంభంలోనే షాక్ తగిలింది. ఓపెనర్ అభిషేక్ శర్మ పరుగులేమీ చేయకుండానే వెనుదిరిగారు. అయితే మరో ఓపెనర్ ఇషాన్ కిషన్ మాత్రం పాక్ బౌలర్లపై విరుచుకుపడ్డారు. కేవలం 40 బంతుల్లోనే 10 ఫోర్లు, 3 సిక్సర్లతో 77 పరుగులు చేసి పాక్ బౌలింగ్ను ముక్కలు చేశారు. అనంతరం కెప్టెన్ సూర్యకుమార్ యాదవ్ (32), తిలక్ వర్మ (25) సమన్వయంతో ఆడగా, చివర్లో శివమ్ దూబె (27) మెరుపులు మెరిపించడంతో భారత్ నిర్ణీత 20 ఓవర్లలో 7 వికెట్ల నష్టానికి 175 పరుగులు చేసింది.
కుప్పకూలిన పాకిస్థాన్ బ్యాటింగ్ లైనప్
176 పరుగుల లక్ష్యంతో బరిలోకి దిగిన పాకిస్థాన్కు భారత బౌలర్లు చుక్కలు చూపించారు. ఆరంభం నుంచే క్రమం తప్పకుండా వికెట్లు కోల్పోయిన పాక్ ఏ దశలోనూ లక్ష్యం వైపు సాగలేదు. ఉస్మాన్ (44) ఒక్కడే ఒంటరి పోరాటం చేసినా, మిగిలిన బ్యాటర్లు పెవిలియన్ కు క్యూ కట్టారు. భారత పేసర్లు, స్పిన్నర్లు సంయుక్తంగా దాడి చేయడంతో పాక్ కేవలం 18 ఓవర్లలో 114 పరుగులకే ఆలౌట్ అయింది.
సమిష్టిగా మెరిసిన భారత బౌలర్లు
ఈ విజయంలో భారత బౌలర్లు కీలక పాత్ర పోషించారు. స్లో పిచ్పై అక్షర్ పటేల్, జస్ప్రీత్ బుమ్రా, వరుణ్ చక్రవర్తి, హార్దిక్ పాండ్యా తలో రెండు వికెట్లు తీసి పాక్ నడ్డి విరిచారు. తిలక్ వర్మ, కుల్దీప్ యాదవ్ చెరో వికెట్ పడగొట్టారు. క్రమశిక్షణతో కూడిన బౌలింగ్తో పాక్ బ్యాటర్లకు పరుగులు ఇచ్చే అవకాశం ఇవ్వకుండా ఒత్తిడి పెంచి విజయాన్ని సులభతరం చేశారు.
పాక్పై తిరుగులేని రికార్డు
టీ20 ప్రపంచకప్ల చరిత్రలో పాకిస్థాన్పై భారత్ తన ఆధిపత్యాన్ని మరోసారి నిరూపించుకుంది. ఇప్పటి వరకు జరిగిన ముఖాముఖి పోరాటాల్లో భారత్ 8 సార్లు విజయం సాధించగా, పాక్ కేవలం ఒకే ఒక్కసారి గెలిచింది. ఈ విజయంతో టీమిండియా అభిమానులు సంబరాల్లో మునిగిపోయారు. సూపర్-8లోనూ ఇదే ఫామ్ను కొనసాగించి కప్పును ముద్దాడాలని అభిమానులు ఆకాంక్షిస్తున్నారు.
#INDvsPAK #T20WorldCup2026 #TeamIndia #IshanKishan #CricketNews #BleedBlue #IndiaWins #Super8 #WorldCupCricket
Experienced sub-editor with a proven track record in major publications, specializing in sharp analytical pieces and deep-dive investigative journalism.
