తెలుగు వైభవం ఉట్టిపడేలా అమరావతి నిర్మాణం:   చంద్రబాబు

రాజధాని అమరావతిని తెలుగు జాతి వైభవాన్ని ప్రపంచానికి చాటిచెప్పేలా, భావితరాలకు గర్వకారణంగా తీర్చిదిద్దాలని ముఖ్యమంత్రి నారా చంద్రబాబు నాయుడు స్పష్టం చేశారు. మంగళవారం సచివాలయంలో జరిగిన 59వ సీఆర్డీఏ అథారిటీ సమావేశంలో ఆయన పాల్గొన్నారు. ఈ సందర్భంగా రాజధాని అభివృద్ధికి సంబంధించిన పలు కీలక ప్రతిపాదనలకు అథారిటీ ఆమోదం తెలిపింది. అమరావతిలో కేవలం భవనాలే కాకుండా, ఆర్థికంగా బలాన్నిచ్చే సెల్ఫ్ ఫైనాన్స్ ప్రాజెక్టులపై అధికారులు ప్రత్యేక దృష్టి సారించాలని సీఎం దిశానిర్దేశం చేశారు.

నీరుకొండలో ప్రతిష్టాత్మక టూరిజం ప్రాజెక్టు

రాజధాని పరిధిలోని నీరుకొండ వద్ద 167 ఎకరాల విస్తీర్ణంలో అత్యంత సుందరమైన టూరిజం ప్రాజెక్టును చేపట్టాలని ముఖ్యమంత్రి ఆదేశించారు. పర్యాటకులను ఆకర్షించేలా వాటర్ ఫ్రంట్, కల్చరల్ సెంటర్, అమ్యూజ్‌మెంట్ పార్కులు మరియు అత్యాధునిక హోటళ్లను ఇక్కడ ఏర్పాటు చేయాలని సూచించారు. తెలుగు సంస్కృతి ప్రతిబింబించేలా ఈ ప్రాంతాన్ని డిజైన్ చేయాలని, నిత్యం ఏదో ఒక కార్యక్రమంతో సందడిగా ఉండేలా ప్రణాళికలు సిద్ధం చేయాలని అధికారులను కోరారు.

ఆదాయ వనరుగా క్రీడలు.. స్పోర్ట్స్ సిటీపై ఫోకస్

భవిష్యత్తులో క్రీడా రంగం అతిపెద్ద ఆర్థిక వ్యవస్థగా అవతరించబోతోందని ముఖ్యమంత్రి అభిప్రాయపడ్డారు. బీసీసీఐ వంటి సంస్థల ఎదుగుదలను ఉదాహరణగా చూపుతూ, అమరావతిలో నిర్మించ తలపెట్టిన స్పోర్ట్స్ సిటీని కమర్షియల్ హబ్‌గా తీర్చిదిద్దాలన్నారు. దీనికోసం మాస్టర్ ప్లాన్‌ను పకడ్బందీగా అమలు చేయాలని, అంతర్జాతీయ స్థాయి క్రీడా వేదికలను నిర్మించి ఆదాయ వనరులను సృష్టించుకోవాలని సూచించారు.

పెట్టుబడిదారులతో నిరంతర సంప్రదింపులు

రాజధానిలో పెట్టుబడులు పెట్టేందుకు ప్రముఖ అంతర్జాతీయ సంస్థలు ఆసక్తి చూపుతున్నాయని, వారితో నిరంతరం టచ్‌లో ఉండాలని సీఎం అధికారులకు సూచించారు. గతంలో హైదరాబాద్ సైబర్ సిటీలో పెట్టుబడులు పెట్టలేకపోయిన సంస్థలు ఇప్పుడు అమరావతిలో ఆ తప్పు చేయకూడదని భావిస్తున్నాయని, ఇది ప్రభుత్వంపై ఉన్న నమ్మకానికి నిదర్శనమని పేర్కొన్నారు. రాజధానిలో భారీ కన్వెన్షన్ సెంటర్ ఏర్పాటు చేయాలని, తెలుగు కల్చరల్ సెంటర్ నిర్మాణానికి త్వరితగతిన చర్యలు తీసుకోవాలని ఆదేశించారు.
#Amaravati #ChandrababuNaidu #CRDA #APCapital #AndhraPradesh #BuildAmaravati #TourismAP #SmartCity

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.