అన్నప్రసాద వితరణలో నిరంతర సేవా యజ్ఞం
టీటీడీ ఆధ్వర్యంలో రోజూ 2.5 లక్షల మందికి ఉచిత అన్నప్రసాదం వితరణ సాగుతోంది. దాతలు రూ. 44 లక్షలతో స్వయంగా ఈ సేవలో పాల్గొనే అవకాశం పొందవచ్చు.
తిరుమల, జూన్ 11: తిరుమల శ్రీవారి దర్శనార్థం వచ్చే భక్తులకు టీటీడీ నిరంతరంగా ఉచితంగా అన్నప్రసాదాలు అందిస్తోంది. ఈ సేవ 1985, ఏప్రిల్ 6న అప్పటి ముఖ్యమంత్రి నందమూరి తారకరామారావు ప్రారంభించిన “శ్రీవేంకటేశ్వర నిత్యాన్నదానం” పథకం నుంచి ప్రారంభమైంది. 1994లో దీనిని ట్రస్ట్గా మార్చి, “శ్రీవేంకటేశ్వర అన్నప్రసాదం ట్రస్ట్”గా నామకరణం చేశారు. మొదటగా పాత అన్నదాన భవనంలో అన్నప్రసాద వితరణ ప్రారంభమైంది. ఇప్పటివరకు రూ.2,190 కోట్ల విరాళాలు ఈ ట్రస్ట్కు అందాయి.
రూ.44 లక్షలతో రోజంతా అన్నప్రసాద వితరణ
ఒక రోజు పూర్తిగా అన్నప్రసాద వితరణకు దాతలు రూ.44 లక్షల విరాళం ఇవ్వవచ్చు. ఈ మొత్తాన్ని వ్యక్తిగతంగా, కుటుంబ సభ్యుల పేరిట, సంస్థల పేరిట ఇవ్వవచ్చు. శ్రీవారి జన్మ నక్షత్రం (శ్రవణం), శ్రీ పద్మావతీ అమ్మవారి జన్మనక్షత్రం (ఉత్తరషాడ), వైకుంఠ ఏకాదశి, పంచమితీర్థం వంటి పవిత్ర రోజులలో విరాళాలు అందించవచ్చు. దాతల పేర్లు వెంగమాంబ అన్నప్రసాద భవనంలోని డిస్ప్లే బోర్డులో ప్రదర్శిస్తారు. ఉదయం అల్పాహారం కోసం రూ.10 లక్షలు, మధ్యాహ్నం మరియు రాత్రి భోజనాలకు రూ.17 లక్షల చొప్పున విరాళాలు ఇవ్వవచ్చు.
రోజూ 2.5 లక్షల మందికి అన్నప్రసాద వితరణ
తిరుమల, తిరుపతి, ఒంటిమిట్టలోని అన్నప్రసాదం కేంద్రాల ద్వారా ప్రతి రోజు 2.5 లక్షల మంది భక్తులకు ఉచితంగా అన్నప్రసాదాలు అందిస్తున్నట్టు టీటీడీ వెల్లడించింది. ముఖ్య కేంద్రాల్లో మాతృశ్రీ తరిగొండ వెంగమాంబ అన్నప్రసాదం కాంప్లెక్స్, వైకుంఠం క్యూ కాంప్లెక్స్ -1, -2, నారాయణగిరి, శిలాతోరణం, కృష్ణతేజ బయట క్యూలైన్లు, తిరుపతిలోని శ్రీనివాసం, విష్ణునివాసం, రుయా ఆస్పత్రి, స్విమ్స్, బర్డ్, ఆయుర్వేద ఆస్పత్రి, తిరుచానూరు, ఒంటిమిట్ట అన్నప్రసాద కేంద్రాలు ఉన్నాయి.
అన్నప్రసాద తయారీకి వందలాది సేవకుల శ్రమ
ఈ కార్యక్రమం విజయవంతంగా కొనసాగేందుకు వందలాది మంది టీటీడీ ఉద్యోగులు, సేవకులు ప్రతిరోజూ పని చేస్తున్నారు. అన్నప్రసాదం విభాగం సేవల ద్వారా భక్తుల నుండి విశేష ఆదరణ పొందుతోంది. ఉచితంగా భోజనాలు అందించడం ద్వారా టీటీడీ విశ్వాసాన్ని మరింత పెంచుకుంటోంది.
