AMARAVATHI: తెలుగుజాతి ఆత్మగౌరవ విజయం!
ATCHEM NAIDU
రాజధానిగా అమరావతిని నిలబెట్టుకోవడం తెలుగు జాతి ఆత్మగౌరవానికి ప్రతీక అని రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు స్పష్టం చేశారు. శనివారం ఏపీ అసెంబ్లీలో అమరావతి చట్టబద్ధత తీర్మానంపై జరిగిన చర్చలో ఆయన కీలక ప్రసంగం చేశారు. గత ప్రభుత్వం సృష్టించిన అనేక అపోహలు, అడ్డంకులను అధిగమించి ప్రజల నమ్మకం గెలిచిందని ఆయన హర్షం వ్యక్తం చేశారు. ముఖ్యమంత్రి చంద్రబాబు నాయుడు నాయకత్వంలో రాష్ట్ర భవిష్యత్తుకు బలమైన పునాది పడిందని ఈ సందర్భంగా కొనియాడారు.
త్యాగాల నుంచి చారిత్రక విజయం వరకు
ఆంధ్రప్రదేశ్ చరిత్రలో అమరావతికి చట్టబద్ధత కల్పించిన ఈ రోజు స్వర్ణాక్షరాలతో లిఖించదగ్గదని మంత్రి అచ్చెన్నాయుడు అభివర్ణించారు. పొట్టి శ్రీరాములు త్యాగం నుంచి మొదలైన తెలుగు వారి ప్రయాణం.. కర్నూలు, హైదరాబాద్ మీదుగా సాగి చివరకు అమరావతికి చేరుకుందని గుర్తుచేశారు. విభజన తర్వాత ఎదురైన క్లిష్ట పరిస్థితుల్లో చంద్రబాబు తీసుకున్న సాహసోపేత నిర్ణయం వల్లే నేడు రాష్ట్రానికి ఒక సుస్థిరమైన రాజధాని ఏర్పడిందని, ఇది అన్ని ప్రాంతాల అభివృద్ధికి కేంద్ర బిందువు కాబోతోందని ధీమా వ్యక్తం చేశారు.
AP DELIMITATION: ఎవరికి లాభం? ఎవరికి నష్టం? ఈ వార్తను కూడా చదవండి
నమ్మకం గెలిచింది.. కుట్రలు కూలాయి
హైదరాబాద్ను వదిలి సొంత రాష్ట్రంలో పరిపాలన ప్రారంభించడం ఒక సాహసోపేతమైన అడుగు అని మంత్రి పేర్కొన్నారు. 2014లో పవన్ కళ్యాణ్ మద్దతుతో అభివృద్ధి పథంలో సాగిన రాష్ట్రం, 2019 తర్వాత జగన్ మోహన్ రెడ్డి తీసుకున్న తుగ్లక్ నిర్ణయాల వల్ల తీవ్రంగా నష్టపోయిందని విమర్శించారు. ప్రాంతాలు, కులాలు, మతాల మధ్య చిచ్చు పెట్టి రాజధానిని వివాదాస్పదం చేసిన వైసీపీ వైఖరిని ప్రజలు తిప్పికొట్టారని ఎద్దేవా చేశారు. అసెంబ్లీకి రాకుండా బయట బ్రోకర్లతో మాట్లాడించే సంస్కృతికి కాలం చెల్లిందని ఘాటుగా స్పందించారు.
చంద్రబాబు నాయకత్వం రాష్ట్రానికి అదృష్టం
అన్ని ఆటంకాలను తట్టుకుని అమరావతిపై నమ్మకాన్ని నిలబెట్టిన ఘనత సీఎం చంద్రబాబుకే దక్కుతుందని అచ్చెన్నాయుడు అన్నారు. ఈ చట్టబద్ధత కేవలం ఒక పరిపాలనా పరమైన నిర్ణయం మాత్రమే కాదని, తెలుగు జాతి గౌరవాన్ని ప్రపంచానికి చాటే చారిత్రాత్మక విజయం అని స్పష్టం చేశారు. చంద్రబాబు వంటి దార్శనికత కలిగిన నాయకుడు ఏపీకి లభించడం రాష్ట్ర ప్రజలు చేసుకున్న అదృష్టమని, అమరావతి ద్వారా భావితరాలకు బంగారు భవిష్యత్తును అందిస్తామని మంత్రి పేర్కొన్నారు.
#Amaravati #APAssembly #AndhraPradesh #Atchennaidu #ChandrababuNaidu #AmaravatiCapital #TeluguPride #APDevelopment #CapitalCity
AP DELIMITATION: ఎవరికి లాభం? ఎవరికి నష్టం? ఈ వార్తను కూడా చదవండి
Experienced sub-editor with a proven track record in major publications, specializing in sharp analytical pieces and deep-dive investigative journalism.
