చెవిలో పువ్వు, పంగనామాలతో ఆవేదన!

తిరుపతి స్విమ్స్ (SVIMS) ఆసుపత్రి కార్మికుల పోరాటం తీవ్రతరమవుతోంది. తమ న్యాయమైన డిమాండ్ల సాధన కోసం కార్మికులు చేపట్టిన నిరసన దీక్ష శనివారంతో 16వ రోజుకు చేరుకుంది. యాజమాన్యం పదేపదే హామీలు ఇస్తూ కాలయాపన చేస్తోందని ఆరోపిస్తూ, శనివారం ఉదయం కార్మికులు అత్యంత వినూత్నంగా నిరసన తెలిపారు. చెవిలో పువ్వులు పెట్టుకుని, ముఖానికి పంగనామాలు వేసుకుని.. “యాజమాన్యం మాకు ఇలాగే పంగనామాలు పెడుతోంది” అంటూ తమ ఆవేదనను చాటుకున్నారు.

ఏడుకొండలవాడా.. నువ్వైనా కళ్లు తెరిపించు!

కలియుగ దైవం శ్రీ వేంకటేశ్వర స్వామిని వేడుకుంటూ కార్మికులు ఈ నిరసన సాగించారు. “మా మొర ఆలకించే నాథుడే లేడు, ఆ ఏడుకొండలవాడే యాజమాన్యం కళ్లు తెరిపించి మాకు న్యాయం చేయాలి” అని కార్మికులు విలపించారు. తమ జీతాలు పెంచాలని, ఏళ్ల తరబడి పెండింగ్‌లో ఉన్న సమస్యలను పరిష్కరించాలని, శానిటేషన్ విభాగం పేరు మార్పు వంటి డిమాండ్లపై స్పష్టమైన హామీ ఇవ్వాలని వారు డిమాండ్ చేశారు. చర్చల పేరుతో పిలిచి సమయం వృథా చేయడం తప్ప, ఆచరణలో ఏమీ జరగడం లేదని వారు మండిపడ్డారు.

Read this article : జనసేన పార్టీ బలోపేతానికి కృషి: ఉయ్యాల ప్రవీణ్

టీటీడీ ఈఓ చొరవ చూపాలి

ఈ సందర్భంగా సీఐటీయూ (CITU) జిల్లా ప్రధాన కార్యదర్శి టి. సుబ్రహ్మణ్యం మాట్లాడుతూ.. టీటీడీ కొత్త ఈఓ బాధ్యతలు చేపట్టి వారం గడుస్తున్నా, స్విమ్స్ కార్మికుల సమస్యలపై ఇంకా స్పందన లేకపోవడం దురదృష్టకరమని అన్నారు. స్విమ్స్ యాజమాన్యం వెంటనే ఈ సమస్యలను టీటీడీ ఉన్నతాధికారుల దృష్టికి తీసుకెళ్లాలని కోరారు. ఆసుపత్రికి వచ్చే రోగులకు ఇబ్బంది కలగకూడదనే ఉద్దేశంతోనే ఇప్పటివరకు శాంతియుతంగా నిరసన తెలుపుతున్నామని, తమను సమ్మె దిశగా పురికొల్పవద్దని హెచ్చరించారు.

పెరుగుతున్న మద్దతు.. ఆటో యూనియన్ సంఘీభావం

రోజురోజుకూ ఈ పోరాటానికి మద్దతు పెరుగుతోంది. శనివారం జరిగిన నిరసనలో ఆటో యూనియన్ నగర కమిటీ ప్రతినిధులు జి. వాసు, హేమాద్రి, రవి పాల్గొని కార్మికులకు సంఘీభావం ప్రకటించారు. రాబోయే రోజుల్లో అన్ని అనుబంధ సంఘాలతో కలిసి పోరాటాన్ని ఉధృతం చేస్తామని నాయకులు స్పష్టం చేశారు. ఈ కార్యక్రమంలో స్విమ్స్ వర్కర్స్ యూనియన్ నేతలు కే. వేణుగోపాల్, ఎం. సూరి, జి. రవి మరియు పెద్ద సంఖ్యలో కార్మికులు పాల్గొన్నారు.

Tirupati #SVIMS #WorkersProtest #CITU #JusticeForWorkers #TTD #HealthCareWorkers #TirupatiNews #LabourRights

Saran Kumar Thalapula

Experienced sub-editor with a proven track record in major publications, specializing in sharp analytical pieces and deep-dive investigative journalism.